სირიის ჩრდილო-დასავლეთით, სადაც ორშაბათს ძლიერი მიწისძვრა მოხდა, თურქეთის საზღვართან მდებარე ქალაქ რაჯოს ციხიდან, სულ მცირე, 20 პატიმარი გაიქცა. ინფორმაციას AFP წყაროზე დაყრდნობით ავრცელებს. მედიის ცნობით, ციხეში პატიმართა უმრავლესობა ისლამური სახელმწიფოს მებრძოლია.
წყარომ მედიასთან განაცხადა, რომ 7.8 მაგნიტუდის მიწისძვრამ, რომელსაც რეგიონში ათობით ბიძგი მოჰყვა, ციხის კედლები და კარი დააზიანა.
“მიწისძვრის შემდეგ, ქალაქი რაჯო დაზარალდა, რის შემდეგაც პატიმრებმა დაიწყეს აჯანყება და აიღეს კონტროლი ციხის ნაწილებზე…დაახლოებით 20 პატიმარი გაიქცა. ისინი, სავარაუდოდ, ისლამური სახელმწიფოს მებრძოლები არიან”, – უთხრა მედიას წყარომ ციხიდან.
ბრიტანეთში დაფუძნებულმა სირიის ადამიანის უფლებათა ორგანიზაციამ დაადასტურა, რომ ციხეში აჯანყება ნამდვილად მოხდა, თუმცა თქვა, რომ ისინი ჯერჯერობით ვერ ამოწმებენ ცნობებს, ნამდვილად გაიქცნენ თუ არა პატიმრები ციხიდან.
ცნობისთვის, თურქეთსა და სირიაში ძლიერი მიწისძვრა 6 თებერვალს მოხდა. ამ დროის მონაცემებით, ორივე ქვეყანაში გარდაცვლილთა რიცხვი 4 300-ს აჭარბებს.
Loading ...
