ზუგდიდში, ფინანსთა სამინისტროს საგამოძიებო სამსახურის მიერ დაკავებულ “ლიბერთი ბანკის” ოთხ ყოფილ თანამშრომელს და ერთ მოქალაქეს, აღმკვეთის ღონისძიების სახით პატიმრობა შეეფარდა. ინფორმაცია “ლაივპრესს” თბილისის საქალაქო სასამართლოში დაუდასტურეს. ბანკის თანამშრომლები, ჩვენი ცნობით, პრობლემური სესხების განყოფილებას წარმოადგენდნენ. საქმე ეხება თაღლითობის გზით მიცვალებულთა პენსიის და დევნილთა შემწეობის მისაკუთრებას.
აღნიშნულ საქმეზე რომ რამდენიმე პირი დააკავეს, ეს ინფორმაცია “ლაივპრესს” ფინანსთა სამინისტროს საგამოძიებო სამსახურში ჯერ კიდევ 23 იანვარს დაუდასტურეს. მომდევნო დღეს კი გაავრცელეს განცხადება, სადაც აღნიშნულია, რომ ერთ-ერთი საბანკო დაწესებულების მომართვის საფუძველზე, სამსახურებრივი მდგომარეობის გამოყენებით, დიდი ოდენობით სხვისი ქონების მოტყუებით დაუფლების ფაქტზე, ბანკის ოთხი ყოფილი თანამშრომელი და ერთი მოქალაქეა დაკავებული.
გამოძიების ინფორმაციით, ბრალდებულებს, სამსახურებრივი უფლებამოსილებიდან გამომდინარე, ხელი მიუწვდებოდათ დევნილთა შემწეობისა და სახელმწიფო პენსიის მიმღებ პირთა საბანკო ანგარიშებზე.
უკანონო მატერიალური სარგებლის მიღების მიზნით, მათ მოიძიეს, აღნიშნული კატეგორიის მოქალაქეთა ანგარიშები, რომლებზეც ნაშთის სახით იყო თანხა, საერთო ჯამში – 71 972 ლარის ოდენობით, რაც სხვადასხვა მანიპულაციის შედეგად, მათთვის სასურველ ანგარიშზე გადარიცხეს და გაანაღდეს.
გამოძიება საქართველოს სისხლის სამართლის კოდექსის 180-ე მუხლის მესამე და მეოთხე ნაწილებით დაიწყო, რაც სასჯელის სახით ითვალისწინებს თავისუფლების აღკვეთას 7-დან 10 წლამდე ვადით. ამასთან, გრძელდება საგამოძიებო მოქმედებები, ამ დანაშაულის ჩადენაში შემჩნეული სხვა პირების მხილების მიზნით.
www.livepress.ge
Loading ...