გიორგი გუჯაბიძე ჯერ სულ რაღაც 13 წლისაა და ის უკვე ლეგო რობოტების წარმატებული ინჟინერი, რობოტიქსის ჯგუფის ლიდერი და მოხალისე მასწავლებელია. გიორგის რობოტების სამყაროთი მას შემდეგ დაინტერესდა, რაც ოზურგეთში “ტექნოპარკი” გაიხსნა. განსხვავებული განვითარების სფეროს აღმოჩენამ მასში დიდი ცნობისმოყვარეობა და ინტერესი გამოიწვია. ამიტომაც, არ დააყოვნა და ჯგუფს შეუერთდა, სადაც პროგრამირებისა და რობოტიკის შესწავლა დაიწყო. გიორგიმ მალევე აუღო ალღო ლეგო რობოტების აწყობასა და პროგრამირებას. დღეს კი უკვე თავის ცოდნასა და გამოცდილებას სხვა ბავშვებს უზიარებს.
როგორც თავად ამბობს, ის ეგზიუპერის პატარა პრინცის მსგავსად სხვა პლანეტიდან ჩამოფრინდა და თავისთვის ახალი, რობოტების სამყარო შექმნა. გიორგი გუჯაბიძე: “ალბათ ეგზიუპერმა ,,პატარა პრინცი” ჩემთვის დაწერა. მე სხვა პლანეტიდან ჩამოვფრინდი, ჩემს პლანეტას ,,ასტეროიდ ბ_612″ ჰქვია. მე იქ ერთი წითელი ვარდი მყავს, რომელიც ამპარტავანი კია, მაგრამ როცა კარგ ხასიათზეა, მიყვება ცისფერი პლანეტის შესახებ, რომელიც სიყვარულით დაცურავს მზის გარშემო. ჩემს ახალ სამყაროს რობოტების სამყარო ქვია. სამყაროში, სადაც მე ვცხოვრობ, ვაწყობ ლეგო რობოტებს, თავდაპირველად ნაწილებს ვამაგრებ ერთმანეთზე, შემდეგ ვაპროგრამებ, ბოლოს ვაძლევ ბრძანებას და ისიც ასრულებს. მომავლისთვის კიდევ მაქვს გეგმები. ეს მხოლოდ სტარტაპია და ვფიქრობ ახალი ტექნოლოგიებთან ერთად განვავითარო ჩემი ცოდნა.”
ავტორი: ლიკა თურქაძე
მომზადებულია პროექტის “განათლებული, პროფესიონალი კადრები რეგიონული მედიის გაძლიერებისთვის” ფარგლებში.
Loading ...