მეხანძრე-მაშველების მიერ ტყიდან გამოყვანისას დაჭრილი მონადირე გზაში გარდაიცვალა

წალენჯიხის მუნიციპალიტეტის მერის, ბესიკ ფარცვანიას ინფორმაციით, მეხანძრე-მაშველების მიერ ტყიდან გამოყვანისას დაჭრილი მონადირე გზაში გარდაიცვალა.

ფარცვანიას თქმით, 62 წლის ო. ქ.-ს ცხედარი ქუთაისის სამხარაულის ბიუროში ექსპერტიზაზეა გადასვენებული.

„ხოკოს მიდამოებში მთაში სანადიროდ იყო. დილის ცხრა საათზე მისი ტელეფონიდან განხორციელდა ზარი 112-ზე, შეტყობინებით, რომ მამაკაცი იყო დაჭრილი. სავარაუდოდ ო. ქ. – მ თვითონ დარეკა 112 ში. საგანგებო სიტუაციების მართვის სამსახური მაშინვე ჩაერთო სამძებრო სამუშაოებში. გამოძახებული იყო საზღვრის დაცვის ვერტმფრენი, თუმცა უამინდობის გამო დაჭრილის გამოყვანა ვერ მოხერხდა. რამდენიმესაათიანი სამძებრო – სამაშველო სამუშაოების შემდეგ ო. ქ. ნაპოვნი იქნა და როცა მაშველებს ჩამოჰყავდათ, გზაში გარდაიცვალა“, – განუცხადა საქართველოს პირველ არხს ბესიკ ფარცვანიამ.

მანამდე, საგანგებო სიტუაციების მართვის სამსახურმა გაავრცელა ინფორმაცია, რომლის თანახმადაც, 112-ში შევიდა შეტყობინება, რომ წალენჯიხის მუნიციპალიტეტში, დაბა ჯვარის მიმდებარე ტყეში, მონადირეს იარაღი გაუვარდა, თვითდაზიანება მიიყენა და დახმარება სჭირდებოდა.

მათივე ინფორმაციით, შემთხვევის ადგილზე დაუყოვნებლივ გაემგზავრნენ მეხანძრე-მაშველები. პარალელურად, სამაშველო ოპერაციაში ჩაერთო სასაზღვრო პოლიციის ვერტმფრენი. უამინდობისა და რთული რელიეფის გამო, დაჭრილი მამაკაცის ვერტმფრენში აყვანა ვერ მოხერხდა.

ქვეითად წასულ მეხანძრე-მაშველებს მონადირე საკაცის დახმარებით, ფეხით მოჰყავდათ საავტომობილო გზამდე.