”მეც მინდოდა ცეცხლში შევარდნა…” -მეხის დაცემის შედეგად ლანჩხუთში მარტოხელა ქალს სახლი მთლიანად დაეწვა

ლანჩხუთის მუნიციპალიტეტის სოფელ სუფსაში წუხელ მეხი საცხოვრებელ სახლს დაეცა. მეხის შედეგად ცეცხლი გაჩნდა და სახლი, რომლის პირველი სართული ხის იყო, მთლიანად დაიწვა.

სახლი მარტოხელა ქალბატონს მანანა ჯიჯეიშვილს ეკუთვნოდა:

”მთელი ღამე წვიმდა, მერე სადღაც 3-4 საათი იყო, რომ ძლიერმა ხმამ გამაღვიძა, მერე კი უცებ ცეცხლიც გაჩნდა, იმ წუთასვე ეზოში გამოვვარდი და საშველად მეზობლებს მოვუხმე, მაგრამ სახლი ძალიან სწრაფად დაიწვა. ყველაფერი დავკარგე. მეც მინდოდა ცეცხლში შევარდნა, მაგრამ მეზობლებმა შემაჩერეს. მარტოხელა ვარ, ავადმყოფი, ახალგაზრდა აღარ ვარ, ცხოვრება რომ ხელახლა დავიწყო. რა მეშველება…”

როგორც სოფელ სუფსაში მერის წარმომადგენელი ამბობს, დროებით ქალბატონს ქირით სხვაგან გადაიყვანენ. შესაძლებელია, მისცენ 2 000 ლარიანი დახმარება და სახურავის მასალა, თუმცა რამდენად შეძლებს ამ თანხით მარტოხელა ქალი, სახლის აგებას, საკმაოდ რთული წარმოსადგენია.

”ხანძრის დროს ტელევიზორს მოვკარით თვალი, ისე, რომ გამოტანა შეიძლებოდა და მხოლოდ ეგ გადავარჩინეთ” – ამბობენ უსახლკაროდ დარჩენილი ქალბატონის მეზობლები. საკუთარი ქონებიდან მანანა ჯიჯეიშვილს სხვა აღარაფერი გააჩნია.

მასალა მომზადებულია პროექტის “ჩვენ ვირჩევთ, ჩვენ ვაკონტროლებთ” ფარგლებში.

Funded through the Alumni Grants Program, U.S. Embassy in Georgia/დაფინანსებულია საქართველოში აშშ–ის საელჩოს ალუმნი საგრანტო პროგრამის ფარგლებში.