”მესმის ზარი, გამოვედი – დავხედე და თორნიკე რეკავს. ავიღე ყურმილი, ხო ძმაო, გისმენ – გისმენ და ხმა არ გამცა” – თორნიკე რიჟვაძესთან დაკავშირებით ალექსი ახვლედიანი პირველ კომენტარს აკეთებს

 “მასთან კომუნიკაცია არის საკმაოდ შეზღუდული ოჯახის წევრებისთვისაც. როგორც ოჯახისგან მაქვს ინფორმაცია, დაუნიშნეს 2-თვიანი საკმაოდ მკაცრი ფსიქოლოგიური მკურნალობა. მხოლოდ ბავშვებს აქვთ ცოტა ხნით შესვლის უფლება. ტელეფონი ან რაიმე მსგავსი მას არ აქვს. ბოლო ინფორმაციით, ალბათ კვირის ბოლოს, ამ დღეებში, თურქეთშივე გაუკეთებენ თვალის ოპერაციას. ფსიქოლოგებმა აუკრძალეს 2-თვიანი კურსის დასრულებამდე საერთოდ ყველანაირი კომუნიკაცია ყველასთან”  – ამბობს ახვლედიანი.

 ახვლედიანი შემთხვევის დღესაც იხსენებს:

 “სადღაც 5 საათზე დამიკავშირდა, ხვალ მაინც მიდიხარ და მოდი ჩავირბინოთ საგარეჯოში, ბიჭები ვნახოთ და გვიან წამოვიდეთ. ვიმყოფებოდი მე, ჩემი უმცროსი შვილი, ორი ადგილობრივი მეგობარი, დამხმარე ქალი და მძღოლი. საათნახევარში შემოგვიერთდა თორნიკეს მამა და მისი სიძე.

ბოლო წელიწადნახევარი თორნიკე არაერთხელ ამბობდა რომ ის უნდა წასულიყო ამ თანამდებობიდან, იმიტომ რომ თვლიდა, 7 წელი ძალიან ბევრი იყო როგორც მისთვის, ისე რეგიონისთვის. ბევრჯერ აქვს ნათქვამი, რომ ჩემს თავსაც ვამჩნევ, რომ ისეთი შემართებით ვეღარ ვარო. მისი ეს სურვილი განსაკუთრებით გააქტიურდა 2024 წლის არჩევნებზე. სურვილი ჰქონდა, რომ თავისი საქმიანობა გაეგრძელებინა დიპლომატიაში. ვერ გეტყვით, ამის შესახებ უთხრა თუ არა პრემიერს, შესაბამის დროს ელოდა, ამიტომ მოხდა ეს ცვლილება თუ არა, არ დამიზუსტებია. როგორც მომიყვა, გათავისუფლების შემდეგ შეხვდა პრემიერს და შეთანხმდნენ, რომ გაეგრძელებინა დიპლომატიურ სამსახურში, თუ იქნებოდა საშუალება დიდ ბრიტანეთში…

ტელეფონი დამჯდარი მქონდა, ტელეფონი დავდე დასატენად და რამდენიმე წუთში მესმის ზარი, გამოვედი – დავხედე და თორნიკე რეკავს. ავიღე ყურმილი, ხო ძმაო, გისმენ – გისმენ და ხმა არ გამცა. მერე გადავურეკე და აღარ იღებდა, რო არ იღებდა გამოვედი ინსტიქტურად რა ხდება რა. მე გასროლის ხმა არ გამიგია, ძალიან შორს იყო. მე წავიყვანე საავადმყოფოში. გონზე არ იყო, მთავარი თემა იყო, იმ დღეს მაგალითად ვისაუბრეთ, მე ვურჩევდი, რომ ეგება ეთხოვა პრემიერისთვის, რომ ბრიტანეთის მაგივრად წამოსულიყო ჩეხეთში ელჩად. იცით, რომ მე საკმაოდ მჭიდრო კავშირები მაქვს… გაცილებით გაუადვილდებოდა მას იქ, ვიდრე ბრიტანეთში და ჩვენც, რადგან უფრო ახლოს იქნებოდა…” – ამბობს ახვლედიანი.