მელია – მივუსხდეთ მოლაპარაკების მაგიდას და განვიხილოთ ახალი არჩევნების საკითხი

“ვაკეთებ განცხადებას ოპოზიციური პირების სახელით, რომ მივუსხდეთ მოლაპარაკების მაგიდას ამ რეჟიმის წარმომადგენლებთან ერთად, ჩვენი ფასილიტატორების დახმარებით და განვიხილოთ საკითხი ახალი არჩევნების ჩატარებასთან დაკავშირებით.” – ცოტა ხნის წინ, “ნაციონალური მოძრაობის” მთავარ ოფისში პარტიის თავმჯდომარემ ნიკა მელიამ ეს განაცხადა და თქვა, რომ ქვეყანას კრიზისიდან მხოლოდ სამართლიანი, ვადამდელი არჩევნები გამოიყვანს.

როგორც ნიკა მელიამ აღნიშნა, პარტიის ამოცანა არასდროს იქნება ძალადობა და სხვისი ჩაგვრა, მათ სურთ, რომ ქვეყანა განვითარდეს, ამისთვის კი აუცილებელია ახალი სამართლიანი არჩევნები:

“ჩვენ დღესაც ერთგულები ვართ იმ მართლაც გარდაუვალი გასატარებელი ცვლილებებისა, რომელიც ქვეყანას კრიზისიდან გამოიყვანს – ეს არის მხოლოდ და მხოლოდ ახალი ვადამდელი არჩევნები, რომელიც წესრიგში მოიყვანს ყველა სფეროს, დაწყებული სამართლებრივი წესრიგიდან, დამთავრებიული სხვა წესრიგებით. ამიტომ, იმედს ვიტოვებთ და ვაკეთებ განცხადებას ოპოზიციური პირების სახელით, რომ მივუსხდეთ მოლაპარაკების მაგიდას ამ რეჟიმის წარმომადგენლებთან ჩვენი ფასილიტატორების დახმარებით და განვიხილოთ საკითხი ახალი არჩევნების ჩატარებასთან დაკავშირებით.

ჩვენი ამოცანა არ არის, არ იყო და არასდროს არ იქნება ძალადობა და ვიზღაცის ჩაგვრა, იმიტომ, რომ ჩვენ მართლები ვართ, ჩვენ გვინდა რომ ქვეყანა განვითარდეს და ქვეყანა განვითარდება მხოლოდ და მხოლოდ ახალი სამართლიანი არჩევნებით.” – განაცხადა მელიამ.

შეგახსნენებთ, ნიკა მელიას პატიმრობა გუშინ შეეფარდა. დღეს მას განჩინების ფურცელი მიუტანეს, თუმცა აღსრულების წარმომადგენლები მელიას ვერ შეხვდნენ.

მოგვიანებით ქვეყნის პრემიერ-მინისტრმა განაცხადა, რომ თანამდებობას ტოვებს, რადგან გაუმართლებლად მიაჩნია ნიკა მელიას დაპატიმრება იმ პირობებში, როდესაც არსებობს პოლიტიკური ესკალაციის საფრთხე და რომ ამ პროცესებთან დაკავშირებით მმართველ გუნდთან შეთანხმებას ვერ მიაღწია.

გიორგი გახარიას ამ განცხადების შემდეგ შინაგან საქმეთა სამინისტრომ სპეციალური მიმართვა გაავრცელა, რომელშიც აღნიშნულია, რომ ნიკა მელიას დაკავების ღონისძიება დროებით გადაიდო.