პოლონეთის პრემიერმა ეროვნული უსაფრთხოების კომიტეტის სხდომა მოიწვია, მედია რაკეტების ჩამოვარდნას იტყობინება

ნატოს წევრი პოლონეთის პრემიერ-მინისტრმა მატეუშ მორავეცკიმ დანიშნა ეროვნული უსაფრთხოებისა და თავდაცვის საკითხებში მინისტრთა საბჭოს რიგგარეშე სხდომა.

მანამდე პოლონეთის მედიაში გაჩნდა ინფორმაცია, რომ უკრაინის საზღვრის მახლობლად მდებარე პოლონეთის რაიონში, სოფელ პშევოდუვში, რუსეთის მიერ ნასროლი ორი რაკეტა ჩამოვარდა. მედიის ცნობებით დაიღუპა ორი ადამიანი.

როგორც Radio Zet-ის კორესპონდენი არაოფიციალურად იტყობინებოდა, სოფელ პშევოდუვში ორი რაკეტა მოხვდა მარცვლეულის საშრობს. არის ცნობა, რომ დაიღუპა ორი ადამიანი. შემთხვევის ადგილზე ჩავიდნენ პოლიციის, პროკურატურისა და არმიის წარმომადგენლები, წერს „ევროპეისკაია პრავდა“.

ამავე დროს Radio Lublin-ი ადგილობრივ პოლიციაზე დაყრდნობით იტყობინება, რომ პშევოდუვში ინციდენტი მოხდა სატვირთო სასწორზე, რომელზეც დატვირთულ ტრაქტორებს წონიან. გამოცემის თანახმად, იქ უცებ აფეთქდა ტრაქტორი, რომელიც სასწორზე იდგა. Radio Lublin-იც ორი დაღუპულის შესახებ იტყობინება.

რაკეტების შესახებ ინფორმაცია ტვიტერში დაადასტურა ლატვიის თავდაცვის მინისტრმა არტის პაბრიკსმა, რომელმაც ვარშავას სამძიმარი გამოუცხადა.

პოლონეთის ხელისუფლების წარმომადგენლებს ჯერჯერობით არ დაუდასტურებიათ ამ ინფორმაციის სისწორე.

მორავეცკიმ პრეზიდენტ ანჯეი დუდასთან კონსულტაციის შემდეგ გასცა განკარგულება სასწრაფო სხდომის ჩატარების თაობაზე. ამის შესახებ მთავრობის წარმომადგენელმა პიოტრ მიულერმა განაცხადა სამშაბათს საღამოს.

მიულერის თქმით, „ნებისმიერს ინფორმაციას, რომელსაც წარუდგენენ დღეს კომიტეტს, მოგვიანებით ამცნობენ საზოგადოებას შეძლებისდაგვარად სრულად.“

15 ნოემბერს რუსეთმა უკრაინაზე განახორციელა ერთ-ერთი ყველაზე მასშტაბური სარაკეტო თავდასხმა. უკრაინის საჰაერო ძალების პრესსპიკერზე დაყრდნობით უკრაინული მედია წერს, რომ რუსეთმა დაახლოებით 100 რაკეტა ისროლა უკრაინის მიმართულებით. ამასთან, რაკეტები ესროლეს ლვოვის რაიონსაც, რომელიც პოლონეთის საზღვართან მდებარეობს.