„მდინარე ადიდდა, გზა მოარღვია, ხელოვნურად შექმნილი კალაპოტი იცვალა და სანაყაროს ნაწილი ჩამორეცხა“ – რა საფრთხეებს იწვევს რიკოთის ავტობანის მშენებლობა

„მდინარე ადიდდა, გზა მოარღვია, ხელოვნურად შექმნილი კალაპოტი იცვალა და სანაყაროს ნაწილი ჩამორეცხა“ – ამის შესახებ გარემოსდაცვითი არასამთავრობო ორგანიზაციის „მწვანე ალტერნატივა“ წარმომადგენელმა, მარიამ ფაცაციამ „რადიო პალიტრას“ გადაცემაში „მწვანე ზონა“, რიკოთის ავტობანის მშენებლობასთან დაკავშირებით საუბრისას, განაცხადა.

ფაცაციას თქმით, ადგილზე მეწყრული პროცესების საშიშროება თვალნათლივ ჩანს, მეორე დიდი პრობლემა კი ფუჭი ქანების უდიერად განთავსებას უკავშირდება.

„რიკოთის ავტობანის მშენებლობის პროცესს 2023 წლიდან ვაკვირდებით, ადგილზე ვმუშაობთ და ვიკვლევთ, თუ რა გავლენა ექნება მთლიან მაგისტრალს ადგილობრივი მოსახლეობის ყოველდღიურობაზე, ასევე გარემოსდაცვითი თვალსაზრისით რა საფრთხეები შეიძლება წარმოიქმნას.

რაც თვალხილულია და ნათლად ჩანს, მეწყრული პროცესებია. გარდა ამისა, კიდევ ერთ მნიშვნელოვან პრობლემად ფუჭი ქანების განთავსება იქცა. უფრო კონკრეტულად, ვგულისხმობ ადგილებს, სადაც მშენებლობის დროს წარმოქმნილი ინერტული მასალის განთავსება ხდება. კვლევაც არ სჭირდება იმას, რომ რიკოთის მიმდებარედ ეს პროცესი სრულიად უდიერად მიმდინარეობს: მდინარე რიკოთულასა და მდინარე ძირულას ნაპირებზე დაახლოებით 26-მდე ფუჭი ქანების სანაყაროა“.

„მწვანე ალტერნატივას“ წარმომადგენელი ყურადღებას ამახვილებს იმ საფრთხეზე, რომლებიც ადგილობრივ მოსახლეობას ემუქრება.

„მიუხედავად იმისა, რომ ზოგ მათგანზე ნებართვა გარემოს დაცვის სამინისტროს მიერაა გაცემული, ეს ადგილები სათანადოდ შესწავლილი არ არის. ხარაგაულის მუნიციპალიტეტის სოფლებში – ხევსა და ვერტყვიჭალაში, სადაც ყველაზე დიდი ფუჭი ქანების სანაყაროა განთავსებული, ძალიან რთული პროცესები მიმდინარეობს და უკვე ადგილობრივი მოსახლეობის უსაფრთხოებას უქმნის საფრთხეს.

ვერტყვიჭალაში მილიონობით ტონა ინერტული მასაა შეტანილი მდინარის ხეობაში ისე, რომ ეს ხეობა გამოკვლეული არაა. ჩემი თვალით ვნახე, რომ მდინარის კალაპოტი რამდენჯერმე შეცვალეს. შედეგად, თებერვლის დიდთოვლობისას მდინარე ადიდდა, გზა მოარღვია, ხელმეორედ შექმნილი კალაპოტი იცვალა და სანაყაროს ნაწილი ჩამორეცხა. ცხადია, ეს პროცესი და იქ მიმდინარე ქიმიური პროცესები ადგილობრივებისთვის სერიოზულ საფრთხეს შეიცავს“, – აღნიშნა მარიამ ფაცაციამ „რადიო პალიტრას“ გადაცემაში „მწვანე ზონა“.

www.bpn.ge