ოზურგეთის საკრებულოს სხდომაზე კამათი ოზურგეთის მერიისა და საკრებულოს წარმომადგენლებს შორის სოფელ დვაბზუში, სპორტულ მოედნამდე მისასვლელი გზის რეაბილიტაციის საკითხს მოჰყვა. ხსენებულ ტერიტორიაზე, რომელიც 800 მეტრის სიგრძისაა, 19 ოჯახი ცხოვრობს. დვაბზუს მაჟორიტარმა დეპუტატმა როზეტა სკამკოჩაშვილმა პროტესტი მას შემდეგ გამოხატა, რაც გაირკვა, რომ სოფელ დვაბზუში ხსნებული გზა წელს ვერ მოასფალტდება. მისი თქმით, აღნიშნული გზის რეაბილიტაციას მერიისგან უკვე დიდი ხანია ითხოვს, თუმცა აღნიშნული მონაკვეთი 2020 წელს განსახორციელებელი ინფრასტრუქტურული პროექტების ნუსხაში მაინც ვერ მოხვდა.
”მე მინდა დავიცვა ხალხის ინტერესი, სხვა ინტერესი მე არ გამაჩნია”.– განაცხადა როზეტა სკამკოჩაშვილმა.
როგორც ოზურგეთის საკრებულოს დეპუტატი მარი ჩხიკვიშვილი ამბობს, აღნიშნულ გზას ოზურგეთის მერია იმიტომ არ აკეთებს, რომ ამ საკითხის ინიცირებაში თვითონ და დედამისი – როზეტა სკამკოჩაშვილი არიან ჩართული. ჩხიკვიშვილი მერიის გადაწყვეტილებას მიზანმიმართულ ქმედებად აფასებს.
აღსანიშნავია, რომ აღნიშნული გზის რეაბილიტაციის მოთხოვნით დვაბზუელებმა საკრებულოს 2019 წლის 3 აპრილს პეტიციით მიმართეს და მას 319 ადამიანი აწერს ხელს.
რაც შეეხება, ოზურგეთის მუნიციპალიტეტის მერიის პოზიციას, მერის მოადგილე ოსიკო თოთიბაძე ამბობს, აღნიშნული ბრალდება სიმართლეს არ შეეფერება. მერის მოადგილე აცხადებს, რომ ამ ეტაპზე სოფელ დვაბზუში ერთი მონაკვეთის რეაბილიტაცია ათ დღეში დასრულდება. 2020– 2021 წლისთვის კი ოზურგეთის სოფლებში შიდა გზების რეაბილიტაცია სრულად მოხდება და სოფელ დვაბზუში აღნიშნული მონაკვეთის მოსაფალტებაც ამ ვადისთვის განხორციელდება.
Loading ...