მარინა ეზუგბაია – კორონავირუსისგან გამოჯანმრთელებულების რაოდენობა უახლოვდება სტაციონარში მკურნალობაზე მყოფი პაციენტების რაოდენობას, რაც ძალიან კარგია

ინფექციური საავადმყოფოს სამედიცინო დირექტორის, მარინა ეზუგბაიას განცხადებით, კორონავირუსით ინფიცირების 5 ახალი შემთხვევის წყარო ცნობილია, მათგან 3 საკარანტინე სივრციდანაა.

როგორც ეზუგბაიამ ჟურნალისტებს განუცხადა, ინფექციურში ამჟამად 47 პაციენტი მკურნალობს.

„გამოჯანმრთელებულების რაოდენობა უკვე უახლოვდება სტაციონარში მკურნალობაზე მყოფი პაციენტების რაოდენობას, რაც ძალიან კარგია. 275 გამოჯანმრთელდა და გაეწერა და 331 მკურნალობს, თუ ასე გაგრძელდება, ალბათ იქნება კარგი და სერიოზული განსხვავება. 5-ვე ახალი შემთხვევის წყარო ცნობილია, მათ შორის 3 საკარანტინო სივრციდანაა და გრძელდება ახლა მათი კონტაქტების ჩაღრმავებული ეპიდემიოლოგიური კვლევა. ჩვენ ახალი პაციენტი არ მიგვიღია, გვყავს 47 პაციენტი, 4-მა გამოჯანმრთელებულმა გუშინ დატოვა კლინიკა”, – განაცხადა ეზუგბაიამ.

მისივე თქმით, კვლავ ერთი კრიტიკული პაციენტი ჰყავთ, რომელთანაც დაავადება პროგრესირებს.

„ამ 47-დან ერთი პაციენტის მდგომარეობა კვლავ კრიტიკულია. უკვე 1 კვირაა, რაც ჩვენთან იმყოფება ეს პაციენტი. კრიტიკულია იმიტომ, რომ ჟანგბადდამოკიდებულია, ის არაინვაზიურ ვენტილაციაზე იმყოფება, მისი მდგომაროება მძიმეა როგორც ასაკის, ისე თანარსებული დაავადებების გათვალისწინებით. ამ 1 კვირის განმავლობაში სტაბილიზაცია ვერ იქნა მიღებული, დაავადება მაინც მცირედ, მაგრამ როგორც კლინიკის, ისე ლაბორატორიული მონაცემებით, პროგრესირებს, ამიტომ დღეს პროგნოზირებაზე ლაპარაკი შეუძლებელია. დაგვრჩა მხოლოდ 1 მძიმე პნევმონიით პაციენტი, დანარჩენების მდგომარეობა გაუმჯობესებულია და როგორც საშუალო, ისე მსუბუქი მდგომაროების მქონე პაციენტი გვყავს”, – აღნიშნა ეზუგბაიამ.