მამუკა ხაზარაძე, „შენების მოძრაობა“ და „ახალი მემარჯვენეები“ პოლიტიკური პარტნიორები ხდებიან

მოძრაობა „ლელოს“ ლიდერი მამუკა ხაზარაძე საზოგადოების წინაშე პარტნიორ პოლიტიკურ პარტიებთან ერთად წარდგა.

„ლელოს“ პარტნიორები დავით უსუფაშვილის „შენების მოძრაობა“ და „ახალი მემარჯვენეები“ იქნებიან. პრეზენტაციაზე ერთობლივი განცხადება ფიქრია ჩიხრაძემ წაიკითხა.

„ჩვენ გვაერთიანებს ამ შემთხვევაში ძალიან მყარი რწმენა იმის თაობაზე, რომ ქვეყანას სჭირდება პროპორციული არჩევნები. თუ პროპორციული არჩევნები არ იქნება, ჩვენ უნდა ვიყოთ მზად ნებისმიერი არჩევნებისთვის, ნებისმიერ დროს“, – თქვა დავით უსუფაშვილმა.

საზოგადოებრივი მოძრაობის დაფუძნების გამოცხადებისას მამუკა ხაზარაძე აცხადებდა, რომ აქცენტს აკეთებდა ისეთ ადამიანებზე, ვისაც პოლიტიკაში საქმიანობის გამოცდილება არ ჰქონდა.

„ესენი არ იქნებიან ძველი პოლიტიკური პარტიის ლიდერები ან იქიდან, ან აქედან. ეს იქნება აბსოლუტურად ახალი ძალა. ეს იქნება ის ხალხი, რომელსაც ახალ საქართველოში უნდა ცხოვრება, რომელსაც ყელში ამოუვიდა ეს ყველაფერი“, – აღნიშნავდა მამუკა ხაზარაძე.

როგორც ხაზარაძემ 28 ნოემბერს „ტვ პირველის“ ეთერში თქვა, ეს მიდგომა შეიცვალა, რადგან ხელისუფლებამ მათ პროპორციული არჩევნების უფლება წაართვა, რამაც გაცილებით სწრაფად მობილიზების აუცილებლობა გააჩინა. ხაზარაძის თქმით, ახლა „დიდი ფრონტის“ გაშლა არის საჭირო.

www.radiotavisupleba.ge