მაიამის საერთაშორისო აეროპორტში სულ ახლახან, 30-დღიანი საპილოტე პროგრამა დაიწყო, რომლის ფარგლებშიც პროფესიონალურად გაწვრთნილი ორი ძაღლი – კობრა და ბეტა – მგზავრებს COVID 19-ის გამოსავლენად შეამოწმებს. კობრა და ბეტა კორონავირუსის დამდგენი მსოფლიოში პირველი ძაღლები არიან, რომლებსაც ალბათ მალე მათი სხვა მეგობრებიც შეუერთდებიან, ხოლო მაიამის აეროპორტი პირველი ადგილია, სადაც ასეთი მნიშვნელოვანი საკითხის გარკვევა ოთხფეხა “პროფესიონალებს” ევალებათ. ინფორმაციას “ბიზნეს ინსაიდერი” ავრცელებს.
კობრა ბელგიური მალინოისის ჯიშია, ბეტა კი ჰოლანდიური ნაგაზი, რომლებიც თვეების განმავლობაში იწვრთნებოდნენ იმისთვის, რომ მგზავრების დაყნოსვით უშეცდომოდ დაადგინონ COVID 19 ვირუსით ინფიცირება. თუკი რომელიმე მგზავრს ძაღლების ამგვარი ტესტირებით ვირუსის ნიშნები დაუდასტურდება, ოთხფეხა პროფესიონალები მათ გაბმული ყეფით აცნობენ სამწუხარო ინფორმაციას.
“ბიზნეს ინსაიდერის” ცნობით, ორივე ძაღლი ფლორიდის საერთაშორისო უნივერსიტეტის სამართლის და იუსტიციის ცენტრში გაწვრთნეს. ვიდრე კობრა და ბეტა საქმიანობას ოფიციალურად შეუდგებოდნენ, მათ არაერთი პრაქტიკული მეცადინეობა გაიარეს, სადაც დროის მცირე შუალედში კორონავირუსით ინფიცირებული მოქალაქეები გამოავლინეს. ცხადია, ინფიცირების შედეგები კოვიდ ტესტებითაც დადასტურდა.
ვირუსის გამოსავლენად, ძაღლები აეროპორტის მგზავრების პირბადეებს ყნოსავენ და ინფიცირების შემთხვევა მათთვის ცნობილი ხდება ადამიანში ვირუსის მეტაბოლური ცვლილებებით გამოწვეული სუნის მეშვეობით. თუკი ძაღლები მგზავრებს COVID 19 ვირუსს გამოუვლენენ, ასეთი ადამიანები დაუყოვნებლივ იკეთებენ სწრაფ ტესტებს ნებისმიერი ეჭვის გასაქარწყლებლად.
მაიამის საერთაშორისო აეროპორტის უსაფრთხოების თანამშრომლების განცხადებით, კობრას და ბეტას დახმარება ამ რთულ პანდემიურ პერიოდში, განსაკუთრებით საჭირო და მნიშვნელოვანია, რადგან ოთხფეხა პროფესიონალები რიგ რესურსებს ზოგავენ. უფრო მეტიც – აეროპორტის თანამშრომლები ძაღლებს “კიდევ ერთ ღირებულ ინსტრუმენტს” უწოდებენ, რომელთა დახმარებითაც კოვიდპანდემიური პროცესების მართვა იოლდება ადამიანური რესურსისთვის ჯანმრთელობის დამატებითი რისკების შექმნის გარეშე.
www.bm.ge
Loading ...
