იტალიის ნაკრების მთავარი მწვრთნელის, ლუჩანო სპალეტის განცხადებით, ფედერციის პრეზიდენტმა აცნობა, რომ მოლდოვასთან 9 ივნისს გასამართი მატჩის შემდეგ თანამდებობას დატოვებს.
იტალიის ეროვნული ნაკრები მოლდოვას მსოფლიო ჩემპიონატის საკვალიფიკაციო ეტაპის ეგიდით შინ მიიღებს. გუნდმა მუნდიალის შესარჩევი ციკლი ნორვეგიასთან მძიმე მარცხით (0:3) დაიწყო და არის შანსი, პლანეტის მთავარი სანაკრებო ტურნირი ზედიზედ მესამედ გამოტოვოს.
„გუშინ ღამით ვესაუბრე და მან (იტალიის ფეხბურთის ფედერაციის პრეზიდენტმა, გაბრიელე გრავინამ) მაცნობა, რომ ეროვნული ნაკრების მთავარი მწვრთნელის პოსტიდან გადამაყენებენ. ეს ფაქტი ნამდვილად სამწუხაროა — ჩვენი ურთიერთობიდან გამომდინარე, გადადგომის განზრახვა არ მქონია.
როცა ყველაფერი კარგად არ მიდის, უმჯობესი იყო დარჩენა და საქმის ბოლომდე მიყვანა, მაგრამ ყველაფერი დასრულებულია“, — განაცხადა ლუჩანო სპალეტიმ.
66 წლის სპალეტიმ იტალიის საფეხბურთო ნაკრები 2023 წელს ჩაიბარა.
Loading ...