ლუგარის ცენტრის წარმომადგენელი – ახალი კორონავირუსისადმი მოსახლეობას ანტისხეულები გამომუშავებული არ აქვს, არც ვაქცინა არსებობს და საფრთხეს სწორედ ეს ქმნის

ახალი ტიპის კორონავირუსი პირველად ერთი თვის წინ დაფიქსირდა. მეცნიერები გავრცელების ადგილად ჩინეთის ქალაქ უხანის ცხოველებისა და თევზის ბაზარს ასახელებენ. დღეს ეს ბაზარი დაკეტილია. უხანში კარანტინია გამოცხადებული, შეზღუდულია სხვა ქალაქებისკენ გადაადგილება.

ამ დროისთვის გარდაცვალების ერთი შემთხვევა ფილიპინებზე, დანარჩენი კი ჩინეთში ფიქსირდება. სხვა ქვეყნებში კორონავირუსით ინფიცირებული არც ერთი პაციენტი არ დაღუპულა. გარდაცვალების რისკი იმ პაციენტებში იკვეთება, რომელთაც ქრონიკული დაავადებები ან სუსტი იმუნური სისტემა აქვთ. რისკჯგუფში შედიან ხანდაზმულებიც. ბოლო მონაცემებით, ახალი ტიპის კორონავირუსი 14 000-მდე ადამიანს დაუდგინდა, 304 პაციენტი გარდაიცვალა, 300-ზე მეტი ადამიანი კი საავადმყოფოებიდან გამოჯანმრთელებული გაწერეს.

კორონავირუსი პირველად 1960-იან წლებში ფრინველში აღმოაჩინეს. მიკროსკოპში პათოგენს გვირგვინისებრი ფორმა ჰქონდა, რის გამოც მეცნიერებმა ლათინური სიტყვა „კორონა“ – „გვირგვინი“ უწოდეს.

ახალი ტიპის კორონავირუსი, ისევე როგორ მისივე მონათესავე მწვავე რესპირატორული სინდრომი (SARS) და ახლო აღმოსავლეთის რესპირატორული სინდრომი (MERS) ზოონოზური, იგივე ცხოველური წარმოშობის ვირუსია. მან მუტაცია განიცადა და ადამიანზე გადავიდა. მწვავე რესპირატორულმა სინდრომმა 2002-2003 წლებში 8000, აღმოსავლეთის რესპირატორულმა სინდრომმა კი 2012 წელს 2500-მდე ადამიანი იმსხვერპლა. ახალი ტიპის კორონავირუსის შტამია 2019-NCOV. ჯერ კიდევ რამდენიმე წლის წინ მეცნიერებმა მიმსგავსებული შტამით ვირუსი ღამურაში აღმოაჩინეს. ერთ-ერთი თეორიით, ღამურისა და სავარაუდოდ გველის გენომის მუტაციამ ახალი ტიპის კორონავირუსი წარმოშვა.

ახალი ტიპის კორონავირუსი ჰაერწვეთოვანი გზით გადადის. ინკუბაციის პერიოდი ორიდან 14 დღემდეა. პირველი სიმპტომებია ცხელება, ცხვირიდან გამონადენი, ყელის ტკივილი, სუნთქვის გაძნელება, ხველა. გართულების შემთხვევაში, პნევმონია და თირკმლის უკმარისობა.

ახალი ტიპის კორონავირუსი დღეს 20-ზე მეტ ქვეყანაში დაფიქსირდა.