ლოს-ანჯელესში მასშტაბური ხანძრის შედეგად დაღუპულთა რიცხვი, სულ მცირე, 24-მდე გაიზარდა.
ლოს-ანჯელესის ოლქის კორონერის ოფისის უახლესი ინფორმაციით, პასიფიკ-პალისეიდის რაიონში გაჩენილი ხანძრის შედეგად 8 ადამიანი, იტონის კერაში კი 16 პირი დაიღუპა.
უწყებების ცნობით, დაღუპულთა რიცხვი, სავარაუდოდ, კიდევ გაიზრდება. დაკარგულთა რიცხვი 16-მდე გაიზარდა – იტონის ხანძრის ტერიტორიაზე 12 ადამიანი, პასიფიკ-პალისეიდის ტერიტორიაზე კი 4 ადამიანი გამოცხადდა დაკარგულად.
ამჟამად განადგურებულ სამეზობლოებში სისტემური საძიებო-სამაშველო სამუშაოები მიმდინარეობს. ჩამოყალიბდა ცენტრი, სადაც ადამიანებს დაკარგული პირების შესახებ შეტყობინება შეუძლიათ.
ლოს-ანჯელესის შერიფის, რობერტ ლუნას თქმით, ოლქში დაახლოებით 150 000 ადამიანი ევაკუაციის ბრძანების ქვეშ რჩება, 700-ზე მეტი მცხოვრები პირი კი 9 თავშესაფარში იმყოფება.
ხანძრის საპასუხოდ მობილიზებულია დაახლოებით 1 400 სახანძრო მანქანა, 84 თვითმფრინავი და 14 000-ზე მეტი პერსონალი, მათ შორის მექსიკიდან ახლახან მოსული მეხანძრეებიც.
ადგილობრივი სახანძრო სამსახურის ხელმძღვანელმა, კრისტინ ქროულიმ მოსახლეობას დაზიანებული სამეზობლოებისთვის თავის არიდებისკენ მოუწოდა. უწყებების ინფორმაციით, ფერფლი შესაძლოა ტყვიას, დარიშხანს, აზბესტსა და სხვა საზიანო ნივთიერებებს შეიცავდეს. ოლქის მოსახლეობისთვის იქმნება ონლაინ მონაცემთა ბაზა, რომელშიც ევაკუირებულ პირებს თავიანთი სახლის სტატუსის შემოწმება შეეძლებათ.
ლოს-ანჯელესის ოლქში ხანძრის რამდენიმე კერა იწვის – ყველაზე მასშტაბური პასიფიკ-პალისეიდის რაიონის ხანძარია.
12 იანვრის დილის მონაცემებით, პასიფიკ-პალისეიდის, იტონის, კენეთისა და ჰარსტის ხანძრებმა 160 კვადრატულ კილომეტრზე დიდი ტერიტორია მოიცვეს. პასიფიკ-პალისეიდის კერის 11% იყო ლოკალიზებული, იტონის ლოკალიზებამ კი 27%-ს მიაღწია. ამ ორმა კერამ ჯამში დაახლოებით 153 კვადრატული კილომეტრი მოიცვა.
მეტეოროლოგიური სამსახურები პროგნოზირებენ, რომ ქარები, რომელთა გამო ლოს-ანჯელესის ხანძრები სწრაფად გავრცელდა, ამ კვირაში გაძლიერდება.
ბოლო მონაცემებით, ხანძრის შედეგად, რომელიც უკვე ითვლება ლოს-ანჯელესის ოლქის ისტორიაში ყველაზე დამანგრეველ ხანძრად, სულ მცირე, 12 000 შენობა განადგურდა. კერძო მეტეოროლოგიური სამსახურის, Accuweather-ის წინასწარი შეფასებით, ხანძრების შედეგად გამოწვეული ფინანსური ზარალი 250 მილიარდ-275 მილიარდ დოლარს შეადგენს.
მასშტაბური ხანძრის გამომწვევი ზუსტი მიზეზი ჯერჯერობით დადგენილი არ არის.
ხანძარი 7 ნოემბერს, პასიფიკ-პალისეიდსის რაიონში დაიწყო, რომელიც სანტა-მონიკასა და მალიბუს შორის მდებარეობს.
www.tabula.ge
Loading ...
