ლენტეხის ყოფილ მერს 18 000-ლარიანი გირაო შეეფარდა

ლენტეხის მუნიციპალიტეტის ყოფილ მერს გია ონიანს, რომელსაც გამოძიება სამსახურებრივი უფლებამოსილების ბოროტად გამოყენებას ედავება, აღკვეთის ღონისძიებად 18 000-ლარიანი გირაო შეუფარდა. გადაწყვეტილება ქუთაისის სასამართლომ მიიღო.

ასევე, 12 000-ლარიანი გირაო შეეფარდა ლენტეხის მერიის არქიტექტურის სამსახურის ყოფილ ხელმძღვანელს, ნუგზარ ტვილდიანს, ხოლო 13 000-ლარიანი გირაო – ზედამხედველობის სამსახურის უფროსს – გიორგი გულბანს.

“გამოძიებით დადგინდა, რომ გია ონიანმა, ლენტეხის მუნიციპალიტეტის მერად არჩევის შემდეგ, სასტუმროს აშენების მიზნით, მიწის ნაკვეთი შეიძინა და მშენებლობის პროექტი დაუკვეთა. პროექტი, რომელიც სამშენებლო ნორმების მოთხოვნებს ვერ პასუხობდა, კერძოდ, განაშენიანების ფართი მოქმედ კოეფიციენტს არ შეესაბამებოდა, გია ონიანმა, მეუღლის სახელზე რეგისტრირებული კომპანიის მეშვეობით, წარადგინა ლენტეხის მუნიციპალიტეტის მერიის არქიტექტურის სამსახურში, რომელსაც ნუგზარ ტვილდიანი ხელმძღვანელობდა და სამშენებლო ნებართვის გაცემა მოითხოვა.

ნებართვის გაცემის პროცესში, გია ონიანმა და ნუგზარ ტვილდიანმა ბოროტად გამოიყენეს სამსახურებრივი უფლებამოსილება, არ გაითვალისწინეს მუნიციპალიტეტის ტერიტორიაზე სავალდებულოდ მოქმედი, “ტერიტორიების გამოყენებისა და განაშენიანების რეგულირების ძირითადი დებულებების შესახებ’’ მთავრობის დადგენილების, აგრეთვე სივრცის დაგეგმარების, არქიტექტურული და სამშენებლო საქმიანობის კოდექსის მოთხოვნები, განაშენიანების ფართის ნაწილში მოქმედ კოეფიციენტთან წინააღმდეგობის ფაქტი, მშენებლობის ადგილზე კულტურული მემკვიდრეობის ძეგლის არსებობა და მიუხედავად იმისა, რომ მშენებლობის საკითხი შეთანხმებული არ ჰქონდათ კულტურული მემკვიდრეობის დაცვის ეროვნულ სააგენტოსთან, ასეთ პირობებში გასცეს კანონმდებლობის შეუსაბამო სამშენებლო ნებართვები.

სასტუმროს მშენებლობის პროცესში, ზედამხედველობის სამსახურმა, რომელსაც გია ონიანის მეუღლის დის ქმარი გიორგი გულბანი ხელმძღვანელობდა, ნაცვლად იმისა, რომ შეეჩერებინა კანონის მოთხოვნათა დარღვევით ნაწარმოები მშენებლობა, რაც გასცდა სამშენებლო მოედნის ფარგლებს და გაგრძელდა კერძო პირისა და სახელმწიფოს საკუთრებაში არსებული მიწის ნაკვეთების საზღვრებში, ასევე განეხორციელებინა მახლობლად არსებული კულტურული მემკვიდრეობის ძეგლის დაცვის სათანადო კონტროლი, გია ონიანს საშუალება მისცა გაეგრძელებინა უკანონო მშენებლობა. ბრალდებულთა აღნიშნული ქმედებით არსებითად დაირღვა სახელმწიფოს კანონიერი ინტერესი”. – წერს პროკურატურა.

ბრალის დამტკიცების შემთხვევაში, დაკავებულებს 3 წლამდე თავისუფლების აღკვეთა ემუქრებათ.