ლანჩხუთში სტიქია გრძელდება – დაზიანებულია გზები და სახლები

სამდღიანი გადაუღებელი წვიმების შედეგად ლანჩხუთში სტიქიური პროცესები გრძელდება. სტიქიამ პრობლემები მუნიციპალიტეტის 16-ივე ადმინისტრაციულ ერთეულში შექმნა. ძირითადად, მეწყრული პროცესები განვითარდა გზებზე და ასევე მეწყერმა დააზიანა საცხოვრებელი სახლები. სოფელ ომფარეთში გზის დაზიანების შედეგად 40-მდე ოჯახს გადაადგილების პრობლემა შეექმნა. ვიდრე გზა არ შეკეთდება, მათ ბევრად გრძელი, შემოვლითი გზით მოუწევთ გარესამყაროსთან დაკავშირება. მოსახლეობას დახმარება ესაჭიროება საცხოვრებელი სახლების შეკეთების მხრივაც. როგორც ამბობენ, ყოველი გაწვიმება მათთვის საფრთხისშემცველია. ლანჩხუთის მუნიციპალიტეტის მერია ზარალს ითვლის. მათი განცხადებით, მას შემდეგ რაც გეოლოგიური დასკვნა იქნება ცნობილი, შესაბამისი სამუშაოები დაიწყება.