ლანჩხუთში დაზიანებული გზის შეკეთების სამუშაოების გამო გარკვეული შეზღუდვები წესდება – ნახეთ როგორ იმოძრავებს ტრანსპორტი

საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტის ინფორმაციით, ზამთრის პერიოდში, რთულმა კლიმატურმა პირობებმა ქალაქ ლანჩხუთის დავით აღმაშენებლის ქუჩაზე გზის საფარი დააზიანა.

დეპარტამენტის ცნობით, ზამთრის პერიოდში დაზიანებული მონაკვეთების შესაკეთებლად სამუშაოები 12, 13, 14 და 17 მარტს განხორციელდება.

„დროის ამ პერიოდში ქალაქ ლანჩხუთში, დავით აღმაშენებლის ქუჩაზე ავტოტრანსპორტი იმოძრავებს ცალმხრივად, კერძოდ: აღმოსავლეთიდან დასავლეთის მიმართულებით მოძრავი ავტოტრანსპორტი იმოძრავებს ჯაპანა-ლანჩხუთის (ასაქცევი) გზის გამოყენებით, ხოლო დასავლეთიდან აღმოსავლეთის მიმართულებით მოძრავი ავტოტრანსპორტი კი – სამტრედია-ლანჩხუთი-გრიგოლეთის საავტომობილო გზის გავლით.

სამუშაოების მიმდინარეობის პერიოდში, 09:00 სთ-დან 18:00 სთ-მდე ჯაპანა-ლანჩხუთისა (ასაქცევი) და სამტრედია-ლანჩხუთი-გრიგოლეთის საავტომობილო გზებზე მისაბმელიანი და ნახევრად მისაბმელიანი ავტოტრანსპორტის გადაადგილება დროებით შეიზღუდება. გთხოვთ, გაითვალისწინოთ, რომ სამუშაოების წარმოების გამო, ავტოტრანსპორტი იმოძრავებს შეფერხებით“, – აღნიშნულია ინფორმაციაში.