„ლანჩხუთმა“ წააგო და ევროსეზონი დაასრულა

ქალთა საფეხბურთო კლუბი „ლანჩხუთი“ ჩემპიონთა ლიგის 1/16 ფინალის განმეორებით მატჩში „როსენგარდს“ შვედეთში ესტუმრა და კვლავ დიდი ანგარიშით დამარცხდა.

საქართველოს ჩემპიონი პირველ მატჩში 0:7 დამარცხდა. ამჯერადაც შვედების უპირატესობა საგრძნობი იყო. მალმიოში გამართულ შეხვედრაში „როსენგარდი“ 32-ე წუთისთვის უკვე 5:0-ს იგებდა, მეორე ტაიმში კიდევ 5 გოლი გაიტანა და საბოლოოდ, შვედეთის ჩემპიონმა 10:0 გაიმარჯვა.

გამორჩეული თამაში ჩაატრა ცანკოციჩმა, რომელმაც ჰეთ-თრიქი შეასრულა, დუბლი კი ანვეგაარდისა და ტროელსგაარდის ანგარიშზეა. ამრიგად, შვედები 1/8-ფინალში გავიდნენ და ჩემპიონთა ლიგისთვის ბრძოლას აგრძელებენ, „ლანჩხუთისთვის“ კი ევროსეზონი დასრულდა.

წაგების მიუხედავად, ქალთა საფეხბურთო კლუბ „ლანჩხუთმა“ ისტორია უკვე დაწერა – ეს პირველი ქართული ქალთა გუნდია, რომელმაც ევროტურნირზე მოიგო, ორი ეტაპი გადალახა და ევროპის 32 საუკეთესო გუნდს შორის დამკვიდრდა.