ლანჩხუთის მერი – ''მეგონა მისაყვედურებდნენ, უფრო მეტად რატომ არ გავზარდეთ ხელფასები''

”სამარცხვინო და ამორალური გადაწყვეტილება” –  ასე უწოდებს ფრაქცია  ”ერთიანი ნაციონალური მოძრაობის” წევრი კახა ასკურავა ლანჩხუთის საკრებულოს მიერ მიღებულ გადაწყვეტილებას, რომლის თანახმადაც ლანჩხუთის მერიის საჯარო მოხელეების ნაწილს ხელფასები გაეზარდათ. რიგგარეშე სხდომაზე მიღებული გადაწყვეტილების თანახმად, მერიის სამსახურების უფროსებს ხელფასი 160 ლარით, ხოლო მთავარ სპეციალისტებს 80 ლარით გაეზარდათ.

ოპოზიციონერი დეპუტატები აღნიშნავენ, რომ მაშინ, როცა ლანჩხუთის მერიის მიერ განხორციელებულ ინფრასტრუქტურულ პროექტებთან დაკავშირებით სახელმწიფო აუდიტმა ძალიან კრიტიკული დასკვნა დადო, ამ სამუშაოების შესრულებაზე პასუხიმგებელ საჯარო მოხელეებს ხელფასის მომატების ნაცვლად სახლში უნდა უშვებდნენ.

ასკურავა აქცენტს ა.ა.ი.პ.-ებში დასაქმებული ადამიანების დაბალ ხელფასებზე აკეთებს და აცხადებს, რომ მათი მიზერული ანაზღაურების ფონზე მერიის თანამდებობის პირებისთვის თანამდებობირივი სარგოების მატება დაუშვებელია.

”სკოლამდელი სააღმზრდელო დაწესებულების მთავარ აღმზრდელს საშუალო ხელფასი 316ლარი აქვს,ხოლო რიგით თანამშრომელს 216. ასევე,მაგალითისთვის აა(ი)პ ბიბლიოთეკის თანამშრომლების ხელფასი 200 ლარს არ აღემატება. იგივე მდგომარეობაა თითქმის ყველა აიპში” – ამბობს ასკურავა.

ოპოზიციისგან წამოსული კრიტიკით გაკვირვებულია ლანჩხუთის მერი. როგორც ალეკო სარიშვილი აცხადებს, მას მოლოდინი ჰქონდა, რომ ოპოზიცია მომატებული თანხის ოდენობას დაიწუნებდა და მოითხოვდა, რომ სამსახურების უფროსებს ხელფასი კიდევ უფრო  გაზრდოდათ. სარიშვილის განცხადებით, ის ადამიანები, რომელთა თანამდებობრივი სარგო გაიზარდა, 24 საათის მანძილზე მუშაობენ და ანაზღაურების გაზრდას იმსახურებდნენ.

ავტორი: თამთა დოლიძე