ლაგოდეხში ერთ ქუჩაზე მყოფ, ხუთ მანქანას საბურავები დაუზიანეს

ლაგოდეხში, თავისუფლების ქუჩაზე, გვიან ღამით ხუთი მანქანა დააზიანეს. მანქანები სახანძრო-სამაშველო სამსახურისა და ხუთსართულიანი საერთო საცხოვრებლის ეზოში იყო დაყენებული.

დაზიანებულია სახანძრო-სამაშველო სამსახურის თანამშრომლების ორი და საერთო საცხოვრებლის ეზოში მდგარი სამი ავტომობილის საბურავები. როგორც დაზარალებულები ამბობენ, ყველა ავტომობილს საბურავი აქვს გაჭრილი.

დაზარალებულები მედიასთან არ საუბრობენ. ადგილობრივები ფიქრობენ, რომ პოლიციას სავარაუდო დამნაშავეების გამოვლენა არ უნდა გაუჭირდეს, რადგან ირგვლივ რამდენიმე ვიდეოსათვალთვალო კამერაა დამონტაჟებული.

“წუხელ ძაღლების ყეფა გავიგე, თუმცა ყურადღება არ მიმიქცევია. დილით ეზოში ჩამოსულს მეზობლებმა მითხრეს, რომ მანქანები დაუზიანებიათ. მარტო ვცხოვრობ, შიშის და დაუცველობის განცდა გამიჩნდა. კარს არ ვკეტავდი ხოლმე და ახლა ძალიან მეშინია”, – უთხრა რადიო თავისუფლებას საერთო საცხოვრებლის ერთ-ერთმა მობინადრემ.

ლაგოდეხში, თავისუფლების ქუჩაზე, შემთხვევის ადგილზე პოლიციის თანამშრომლები მუშაობენ. მიმდინარეობს ვიდეოსათვალთვალო კამერების ჩანაწერების შესწავლა, დაზარალებულების და ადგილობრივების გამოკითხვა.

წყარო-რადიო თავისუფლება