კულტურის სამინისტრომ ვასილ ჩიგოგიძე ოზურგეთის სახელმწიფო დრამატული თეატრის სამხატვრო ხელმძღვანელის პოზიციაზე წარადგინა

საქართველოს კულტურის, სპორტისა და ახალგაზრდობის სამინისტრომ პროფესიული სახელმწიფო თეატრების სამხატვრო ხელმძღვანელების კანდიდატთა შესარჩევ სარეკომენდაციო საბჭოს ორი თეატრის სამხატვრო ხელმძღვანელად კანდიდატურები წარუდგინა. ესენია გიორგი მიქელაძის სახელობის თბილისის თოჯინების სახელმწიფო თეატრის სამხატვრო ხელმძღვანელად ნიკა საბაშვილის კანდიდატურა, ხოლო ალექსანდრე წუწუნავას სახელობის ოზურგეთის სახელმწიფო დრამატული თეატრის სამხატვრო ხელმძღვანელის პოზიციაზე – ვასილ ჩიგოგიძის კანდიდატურა.

ორივე კანდიდატი მოცემული თეატრების მოქმედი სამხატვრო ხელმძღვანელები არიან, რომლებსაც უფლებამოსილების ვადა 2022 წლის 1 იანვარს ეწურებათ. ორივე თეატრში სამხატვრო ხელმძღვანელის შესარჩევად კონკურსი მიმდინარე წლის 8 დეკემბერს გამოცხადდა.

აღსანიშნავია, რომ სამინისტროსთან არსებულ პროფესიული სახელმწიფო თეატრების სამხატვრო ხელმძღვანელების კანდიდატთა შესარჩევი სარეკომენდაციო საბჭოს დებულების თანახმად (რომელიც მინისტრის ბრძანებით მიმდინარე წლის 6 დეკემბერს დამტკიცდა), კონკურსს აცხადებს სამინისტრო, ხოლო თეატრების სამხატვრო ხელმძღვანელობის კანდიდატთა შესარჩევი საკონკურსო პირობები განისაზღვრება კანონმდებლობით დადგენილი კრიტერიუმების მიხედვით. ამასთან, სამინისტრო, წარდგენილი კანდიდატებისგან შეარჩევს არანაკლებ 2 და არაუმეტეს 3 კანდიდატს, გარდა იმ შემთხვევისა, როდესაც წარდგენილია მხოლოდ ერთი კანდიდატი. შერჩეულ კანდიდატთა სია წარედგინება სარეკომენდაციო საბჭოს, რომელიც შეარჩევს სამხატვრო ხელმძღვანელის თანამდებობაზე დასანიშნ კანდიდატურას და წარუდგენს კულტურის მინისტრს.

სარეკომენდაციო საბჭო ვალდებულია, კანდიდატის წარდგინებიდან 1 თვის ვადაში წარუდგინოს მინისტრს თავისი რეკომენდაცია.