კრიშტიანუ რონალდუს სკანდალური ბრალდება „მანჩესტერ იუნაიტედს”

„მანჩესტერ იუნაიტედის” ფორვარდი, კრიშტიანუ რონალდუ ამბობს, რომ კლუბმა მას უღალატა და ის იძულებით გააძევეს. ამის შესახებ მან ცოტა ხნის წინ მიცემულ ინტერვიუში განაცხადა. ინფორმაციას ამის შესახებ უცხოური მედია ავრცელებს.

გამოცემის ცნობით, ჟურნალისტის კითხვაზე  ცდილობდა თუ არა იუნაიტედის იერარქია კლუბიდან მის გაძევებას, რონალდუმ ასე უპასუხა:

„დიახ. არა მხოლოდ მწვრთნელი (თენ ჰეგი), არამედ კიდევ ორი ან სამი ადამიანი კლუბში. ვგრძნობდი, რომ მიღალატეს. […] ვგრძნობდი, რომ ზოგიერთს არ უნდოდა ჩემი აქ ყოფნა, არა მხოლოდ წელს, არამედ შარშანაც”, – თქვა მან.

რონალდუს თქმით, „მანჩესტერ იუნაიტედმა” მას მხარი არ დაუჭირა, როდესაც მისი ქალიშვილი საავადმყოფოში გადაიყვანეს ივლისში. მან თქვა, რომ კლუბს ეჭვი ეპარებოდა და ნაკლები თანაგრძნობა გამოიჩინა, როდესაც ის ვარჯიშზე მივიდა.