კრემლმა დაადასტურა მედიით გავრცელებული ინფორმაცია, რომ ამბოხების შემდეგ, რუსეთის პრეზიდენტი ვლადიმირ პუტინი კრემლში შეხვდა კერძო სამხედრო კომპანია „ვაგნერის“ დამფუძნებელს, ევგენი პრიგოჟინს. ინფორმაცია მათი შეხვედრის შესახებ პირველმა გაავრცელა ფრანგულმა გამოცემა Libération-მა.
პრეზიდენტ პუტინის პრესმდივანმა დმიტრი პესკოვმა დღეს, 10 ივლისს, მოსკოვში ჟურნალისტებს განუცხადა, რომ ეს შეხვედრა კრემლში 29 ივნისს გაიმართა. პესკოვის ინფორმაციით, პრეზიდენტმა პუტინმა მიიწვია „ვაგნერის“ რაზმების 35 მეთაური და კომპანიის ხელმძღვანელები, მათ შორის პრიგოჟინი.
კრემლის პრესმდივნის თანახმად, შეხვედრაზე, რომელიც თითქმის სამ საათს გაგრძელდა, რუსეთის პრეზიდენტმა შეაფასა უკრაინაში, „სპეციალური სამხედრო ოპერაციის“ მსვლელობისას კომპანიის ქმედებები და 24 ივნისის მოვლენები, „ვაგნერის“ მეთაურთა განმარტებები მოისმინა და შესთავაზა „შემდგომი დასაქმების და საბრძოლო გამოყენების ვარიანტები“. პესკოვის განცხადებით, „ვაგნერის“ მეთაურებმა ხაზი გაუსვეს, რომ სახელმწიფოს მეთაურის და უმაღლესი მთავარსარდლის (პუტინის) „მტკიცე მხარდამჭერები და ჯარისკაცები არიან და მზად არიან სამშობლოსთვის ისევ იბრძოლონ”.
წყარო: radiotavisupleba.ge
Loading ...
