კრემლის პრესსპიკერმა დმიტრი პესკოვმა ცოტა ხნის წინ დაადასტურა, რომ აშშ-ს პრეზიდენტი დონალდ ტრამპი და რუსეთის პრეზიდენტი ვლადიმირ პუტინი ხვალ, 18 მარტს ტელეფონით ისაუბრებენ. ინფორმაციას Associated Press ავრცელებს.
მიუხედავად იმისა, რომ ტრამპის განცხადებით, საუბარი უკრაინაში მიმდინარე ომს შეეხება, პესკოვმა უარი თქვა იმ საკითხის დასახელებაზე, რომელსაც ორი ლიდერი სატელეფონო ზარისას განიხილავს.
“ჩვენ არასდროს გვინდა, გავუსწროთ მოვლენებს. ორ პრეზიდენტს შორის საუბრების შინაარსი წინასწარი განხილვის თემა არ არის”. – თქვა პესკოვმა.
ცნობისთვის, აშშ-ს პრეზიდენტმა რამდენიმე საათის წინ განაცხადა, რომ რუსეთის პრეზიდენტთან, ვლადიმირ პუტინთან 18 მარტს, ტელეფონით ილაპარაკებდა.
ამის შესახებ ტრამპმა რეპორტიორებთან საუბრის დროს განაცხადა.
“სამშაბათს პრეზიდენტ პუტინთან ვილაპარაკებ. შაბათ-კვირის განმავლობაში ბევრი რამ გაკეთდა. […] გვსურს, ვნახოთ, შეგვიძლია თუ არა, რომ ეს ომი დავასრულოთ. შესაძლოა, შეგვიძლია, შესაძლოა, არა, მაგრამ ვფიქრობ, რომ ძალიან კარგი შანსი გვაქვს”. – თქვა ტრამპმა.
ჟურნალისტების კითხვაზე, თუ რა დათმობები განიხილება ცეცხლის შეწყვეტის შესახებ მოლაპარაკების ფარგლებში, ტრამპმა თქვა, რომ ლაპარაკი “მიწასა” და “ელექტროსადგურებზე” მიმდინარეობს.
“მიწაზე ვილაპარაკებთ. ელექტროსადგურებზე ვილაპარაკებთ. […] ვფიქრობ, ბევრი რამ ორივე მხარემ, უკრაინამ და რუსეთმა, უკვე განიხილეს. ამაზე უკვე ვლაპარაკობთ, გარკვეული რესურსების განაწილებაზე”. – თქვა ტრამპმა.
შეგახსენებთ, რომ 11 მარტს საუდის არაბეთში უკრაინულ და ამერიკულ დელეგაციებს შორის გამართული შეხვედრის შემდეგ ცნობილი გახდა, რომ კიევი თანახმაა 30-დღიან ცეცხლის შეწყვეტაზე, თუ ამას მოსკოვიც დათანხმდება. ვაშინგტონმა დადო პირობა, რომ ამ წინადადებას რუსულ მხარეს გადასცემდნენ. 12 მარტს რუსეთში დონალდ ტრამპის სპეციალური წარმომადგენელი სტივ უიტკოფი ჩავიდა, რათა ცეცხლის შეწყვეტის წინადადება და ორმხრივი ურთიერთობები განიხილონ.
Loading ...