ერთიანობა-ნაციონალური მოძრაობის წევრმა, თამარ კორძაიამ საარჩევნო დარღვევების შესახებ ისაუბრა. კორძაია ამბობს, რომ ვერიფიკაციის აპარატებს პრობლემები ჰქონდა.
“დმანისში, ერთ-ერთ საარჩევნო უბანზე ქალმა ხმა პირადობის მოწმობის გარეშე მისცა. საკუთარი პირადობის მოწმობის ფოტო მას ტელეფონში ჰქონდა და ხმის მიცემის უფლება ამით მისცეს. ამას მასობრივი ხასიათი ჰქონდა და საქართველოს მასშტაბით, ასეთი არაერთი ფაქტი დაფიქსირდა.
ის ტექნიკური საშუალებები, რითიც არჩევნები ჩატარდა, პრობლემურია და არაერთ კითხვას აჩენს. ამომრჩეველთა ვერიფიკაციის აპარატი, სადაც სწორედ ზემოთ ნახსენები პირადობის მოწმობით უნდა გაეტარებინათ ამომრჩეველი, ნებისმიერი ფორმისა და სახეობის ამომრჩეველთა სიის ჩატვირთვისა და ამომრჩევლის მონაცემების რამდენიმე უბანზე დუბლირების შესაძლებლობას იძლეოდა. შესაბამისად, თუ იმ ქალმა ხმა ერთ უბანზე პირადობის ფოტოთი მისცა, მეორე, მისი მსგავსი გარეგნობის, გრძელთმიანი ახალგაზრდა მისი ნამდვილი პირადობის მოწმობით წავიდოდა, ან თავად წავიდოდა სხვაგან. ასეთი დუბლირების ფაქტი არაერთხელ მოხდა.
მასიურად გამოვლინდა შემთხვევები, როცა საარჩევნო უბნებზე ცალკეული ვერიფიკაციის აპარატების დესინქრონიზაცია ხდებოდა, ანუ მათი ერთმანეთისგან დაშორება, რადგან მონაცემები ვერიფიკაციის ოთხივე აპარატში არ გამოჩენილიყო, რაც ცალკე, ერთ-ერთ აპარატში დამატებით სხვა სიების არსებობისა და გაყალბებული პირადობებით ხმის მიცემის შესაძლებლობას იძლეოდა”. – თქვა კორძაიამ.
კორძაიამ ასევე თქვა, რომ ელექტრონულ აპარატებს მხოლოდ ცესკოს მიერ შერჩეული კადრები აკონტროლებდნენ და ამ პროცესში ოპოზიციური პარტიების წარმომადგენლები არ ჩართეს.
“ასევე, საარჩევნო უბნებზე მაღალსიჩქარიანი, 5G ინტერნეტკავშირი იყო, რომელიც პლანშეტში იყო ჩართული. ინტერნეტკავშირი მობილური ოპერატორების მეშვეობით მყარდებოდა, პლანშეტი კი ცესკოს სერვერებს იყო მიერთებული. არჩევნების დღეს გამოვლინდა შესაძლებლობა, რომ პლანშეტის, ვერიფიკაციისა და ხმის მთვლელი აპარატების ურთიერთკავშირით შესაძლებელია უმნიშვნელოვანესი ინფორმაციის მიღება და ცოცხალ რეჟიმში კონტროლი. ელექტრონული აპარატები მთლიანად ცესკოს მიერ შერჩეული და დატრენინგებული ტექნიკური პერსონალისა და კომისიის წევრების მიერ კონტროლდებოდა და ამ პროცესში სხვა საარჩევნო სუბიექტების წარმომადგენლებს დაშვება არ ჰქონდათ. რაც იმას ადასტურებს, რომ პროცესი გამჭვირვალე არ იყო”. – ამბობს კორძაია.
კორძაიას თქმით, ვერიფიკაციის აპარატები მასიურად არ ატარებდა აიდი ბარათებს და რეგისტრატორებს ამომრჩევლის პირადი ნომერი ხელით შეჰყავდათ. კორძაია ამბობს, რომ მათ შესაძლებლობა ჰქონდათ, იმ მოქალაქეების პირადი ნომრები გამოეყენებინათ, რომლებიც საარჩევნო უბნებზე ვერ მივიდოდნენ.
Loading ...