ავსტრალიის ეროვნული სამეცნიერო სააგენტოს, CSIRO-ს კვლევის თანახმად, კორონავირუსი ფულზე, მინასა და უჟანგავ ფოლადზე 28 დღე რჩება ანუ იმაზე დიდხანს ვიდრე – გრიპის ვირუსი. ამის შესახებ Reuters-ი წერს.
შედარებისთვის, ინფლუენზა A ტიპის ვირუსი ზედაპირზე 17 დღე ძლებს.
„ეს კიდევ ერთხელ უსვამს ხაზს ხელების დაბანის, დეზინფექციის და ზედაპირების სანიტარული დამუშავების მნიშვნელობას“, – ამბობს კვლევის ხელმძღვანელი შეინ რიდელი.
ექსპერიმენტის 20, 30 და 40 გრადუსის პირობებში ჩატარებამ აჩვენა, რომ ვირუსი უფრო დიდხანს ძლებს დაბალ ტემპერატურასა და გლუვ ზედაპირებზე. ამასთან, დადგინდა, რომ კორონავირუსი შედარებით დიდხანს რჩება ქაღალდის ფულზე, ვიდრე – პოლიმერული მასალისგან დამზადებულ კუპიურებზე.
“ზაფხულისთვის, ეს ნამდვილად მნიშვნელოვანი ფაქტორი იქნება – ვირუსი თბილ ტემპერატურაზე შედარებით ცოტა ხნით რჩება”, – აცხადებს რიდელი.
ყველა ექსპერიმენტი ჩატარდა სიბნელეში, ულტრაიისფერი სინათლის ზემოქმედების გამოსარიცხად, რადგან კვლევამ აჩვენა, რომ მზის პირდაპირმა სხივმა, შეიძლება, ვირუსი მოკლას.
მედიკოსები ფიქრობენ, რომ მსგავსი ტიპის კვლევა დაეხმარებათ, უკეთ განსაზღვრონ ვირუსის გავრცელება და შეებრძოლონ მას. აქედან გამომდინარე, მსოფლიო ჯანდაცვის სისტემები თანხმდებიან, რომ სოციალური დისტანცია, პირბადის ტარება და ხელების ხშირი დაბანა COVID-19-თან გასამკლავებლად ამჟამად ერთადერთი და, შეიძლება ითქვას, ყველაზე ეფექტური იარაღია.
bm.ge
Loading ...