„ქართული ოცნების“ მთავრობის წევრებისთვის ევროკავშირში დაწესებული სანქცია, რომელიც დიპლომატიური პასპორტის მქონე ადამიანებისთვის ვიზის აღებას ითვალისწინებს, უკვე ამოქმედებულია. ეს დაადასტურა ამავე მთავრობის პრემიერ-მინისტრმა ირაკლი კობახიძემ და ჟურნალისტებთან საუბრის დროს საკუთარი მაგალითი დაასახელა.
„ეს შეზღუდვები დიპლომატიურ პასპორტებთან დაკავშირებით, როგორც მოგეხსენებათ, მოქმედებს ევროკავშირის საერთო გადაწყვეტილებით. ჩვენ ჩვეულებრივად ვიღებთ ვიზებს. ვიზით ვიყავი წასული ერთ-ერთ ქვეყანაში, არანაირი პრობლემა აქ, რა თქმა უნდა, არ არის. ბუნებრივია, ეს არის აბსოლუტურად სამარცხვინო გადაწყვეტილება, თუმცა ეს არის მათი უფლება და მზად ვართ ვიმოქმედოთ ამ გადაწყვეტილების შესაბამისად“, – თქვა ირაკლი კობახიძემ.
მას არ დაუკონკრეტებია, ევროკავშირის რომელ ქვეყანაში ჩასასვლელად დასჭირდა ვიზის აღება. თუმცა ბოლო თვეების განმავლობაში ის და მისი მთავრობის სხვა წევრები იმყოფებოდნენ იტალიასა და უნგრეთში. მათგან უნგრეთს გაცხადებული პოზიცია აქვს, რომ არ შეუერთდება ამ შეზღუდვებს.
კობახიძე, მისი მთავრობის წევრებთან და „ქართული ოცნების“ ლიდერებთან ერთად იტალიაში ივნისის პირველ ნახევაშრი იმყოფებოდა. ისინი 10 ივნისს ქალაქ მილანში საქართველოს გენერალური საკონსულოს გახსნის ცერემონიალში მონაწილეობდნენ – ეს საკონსულო მილანში 2023 წლიდან ფუნქციონირებს და ჰყავს კონსული, ნატალია კორძაია.
Loading ...