კობახიძე: ფარდას ავხდიდით იმ შემთხვევაში, რომ არ ეღიარებინათ ჩვენი ევროპული პერსპექტივა

წინ წავიწიეთ ევროკავშირისკენ და ასეთ დროს, ბუნებრივია, არაფრისთვის ფარდის ახდას არ ვაპირებთ, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა, რითაც უპასუხა კითხვას, რას გულისხმობდა ირაკლი ღარიბაშვილი „ფარდის ახდაში“ და რას უნდა ახადონ ფარდა.

მისივე თქმით, გუნდში იმსჯელეს და გადაწყვიტეს, რომ „უხერხულობების გარეთ გამოტანისგან თავს შეიკავებენ“.

„ფარდას ავხდიდით იმ შემთხვევაში, ევროკავშირს რომ არ ეღიარებინა ჩვენი ევროპული პერსპექტივა. ამ შემთხვევაში წინ წავიწიეთ ევროკავშირისკენ და ასეთ დროს ბუნებრივია, არაფრისთვის ფარდის ახდას არ ვაპირებთ.

საუბარი იყო სწორედ იმ ხელშემშლელ ფაქტორებზე, რომლებმაც რაღაცები განაპირობა, მაგრამ საბედნიეროდ, რაღაცები ვერ განაპირობა. დღეს, როცა ევროკავშირმა მიიღო დადებითი გადაწყვეტილება და ჩვენ ძალიან დიდი ნაბიჯი გადავდგით ევროკავშირის მიმართულებით, ამ უხერხულობების გარეთ გამოტანისგან თავს შევიკავებთ, ეს არის ჩვენს გუნდში შეჯერებული პოზიცია, ამაზე გვქონდა რა თქმა უნდა, მსჯელობა. როცა ევროკავშირი შენსკენ დგამს ნაბიჯებს, იქ რაღაც უხერხულობების გამოტანა არ არის მიზანშეწონილი,“- განაცხადა კობახიძემ.

შეგახსენებთ, ირაკლი ღარიბაშვილმა განაცხადა, რომ თუ ევროპული საბჭოს „გადაწყვეტილება უსამართლო და შეურაცხმყოფელი იქნება, ყველაფერს ფარდას ახდის.“

ცნობისათვის, ევროკომისია ევროპულ საბჭოს რეკომენდაციას აძლევს, უკრაინას და მოლდოვას ევროკავშირის წევრობის კანდიდატის სტატუსი მიანიჭოს, საქართველოსთან დაკავშირებით კი აცხადებს, რომ საკითხს კონკრეტული პირობების შესრულების შემდეგ დაუბრუნდება.