კივის სეზონი აქტიურ ფაზაშია – რა ღირს პროდუქტი ბაზარზე

დასავლეთ საქართველოს რეგიონებში „ჰეივორდის“ ჯიშის კივის სეზონი აქტიურ ფაზაშია და მოსავლის აღება მიმდინარეობს. პორტალ EastFruit-ის შეფასებით, წელს მოსავლიანობა საშუალოა, ადგილობრივი ფასები სტაბილური, საექსპორტო ფასები კი მაღალია. წლევანდელ მოსავალზე უამინდობას სერიოზული უარყოფითი გავლენა არ მოუხდენია, თუმცა ზაფხულის ბოლო შემოდგომის დასაწყისის ინტენსიურმა წვიმებმა, მანდარინის მსგავსად, კივის ნაყოფის ზრდასაც უმნიშვნელოდ შეუშალა ხელი.

საქართველოს კივის მწარმოებელთა ასოციაცია მოელის, რომ წელს 90-100 ტონა კივის მოსავალს მიიღებენ, რაც საშუალო მოსავლიანობად ითვლება. ასოციაცია თავის მოსავალს საქართველოში კივის უმსხვილეს მწარმოებელ და ექსპორტიორ კომპანია Nergeta-ზე ყიდის. თუმცა კომპანიას თავისი პირობები აქვს და ფერმერებისგან მხოლოდ მსხვილ კივს ყიდულობს, რომლის თითო ნაყოფიც, მინიმუმ, 94 გრამს უნდა იწონიდეს. ამდენად, დანარჩენ მოსავალს ასოციაცია ადგილობრივ ბაზარზე ყიდის.

Nergeta-მ ფერმერებისთვის 1 კგ. კივის ფასი შარშანდელი 3,8 ლარიდან (1,15 დოლარიდან) წელს 4,5 ლარამდე (1,43 დოლარამდე) გაზარდა. თუმცა, EastFruit-ის შეაფასებით, ფასების ასეთი ზრდა ფერმერებისთვის დიდი შეღავათი არ არის, რადგან ქვეყანაში სხვადასხვა პროდუქტზე რეალური ფასები საგრძნობლად გაიზარდა. ამასთან, მაღალი ხარისხის პროდუქცია მთლიანი მოსავლის მხოლოდ 30-40%-ს შეადგენს, ხოლო ადგილობრივ ბაზარზე 1 კგ. მცირე ზომის კივის ფასი დაბალია და, დაახლოებით 2 ლარს (0,63 დოლარს) შეადგენს, რაც წინა რამდენიმე სეზონიდან მოყოლებული უცვლელი რჩება.

კივის მწარმოებელთა ასოციაციაში აცხადებენ, რომ ადგილობრივ ფასებზე გავლენას იმპორტი ახდენს, რაც, ძირითადად, ირანიდან ხდება. საქართველოდან კივის ექსპორტი მცირე რაოდენობით, იაპონიასა და გერმანიაში ხორციელდება, იმპორტს კი მთელი წლის განმავლობაში, უმეტესად ნოემბრიდან აპრილამდე ეწევიან.

2020-2021 წლების სეზონზე, ანუ ნოემბერ-აპრილში იმპორტმა 1183 ტონა შეადგინა მაშინ, როცა კივის ადგილობრივი მოსავალი 2020 წელს 1500 ტონა იყო. EastFruit-ის მონაცემებით, კივის იმპორტი ყოველწლიურად იაფდება. მაგალითად, მიმდინარე წლის ოქტომბერში საქართველომ 97 ტონა კივი, CIF პირობით, ტონაზე 390 დოლარად შემოიტანა, რაც 2018 წლის ოქტომბერში დაფიქსირებულ CIF ფასზე, 460 დოლარზე 15%-ით ნაკლებია.

www.bpn.ge