კიევში სარაკეტო თავდასხმების შედეგად ორი მრავალსართულიანი კორპუსი დაზიანდა, არის მსხვერპლი

კიევში დილით მომხდარი დაბომბვის შედეგად ორი ადამიანი დაიღუპა, ერთი კი საავადმყოფოში გადაიყვანეს. ამის შესახებ ინფორმაციას ქალაქ კიევის საგანგებო სიტუაციების სამსახურის მთავარი სამმართველოს პრესმდივანი სვეტლანა ვოდოლაგა „ფეისბუქის“ საკუთარ გვერდზე ავრცელებს.

ვოდოლაგას განცხადებით, 35 ადამიანის გადარჩენა და ევაკუაცია მოხერხდა, ერთი ადამიანი კი ჰოსპიტალიზებულია.

„დღეს დილით, 4:22 საათიდან დილის 5:51 საათამდე, მტრის დაბომბვის შედეგად საბრძოლო ნარჩენები მოხვდა ორ მრავალსართულიან საცხოვრებელ კორპუსს სვიატოშინსკის რაიონში, ერთ კერძო სახლს ოსოკორკას რაიონში და მეორე მრავალსართულიან კორპუსს ქ. პოდოლსკის რაიონში. ახლა უკვე დანამდვილებით ვიცით ორი დაღუპულის, 35 გადარჩენილის შესახებ, ერთი კი საავადმყოფოშია გადაყვანილი“, – წერს იგი.

ინფორმაცია დაშავებულების შესახებ ჯერ კიდევ ზუსტდება.

მანამდე გავრცელდა ინფორმაცია, რომ კიევში პოდოლსკის რაიონში მდებარე მაღალსართულიანი შენობა, ისევე როგორც კერძო სახლი ოსოკორკში დაბომბეს. გარდა ამისა, აფეთქების ტალღამ დააზიანა მეტროსადგურ ლუკიანოვსკაიას ფასადი.