კიევში აცხადებენ, რომ ელოდებიან ერთ-ერთ მთავარ პარტნიორს და იმედია, რომ „სიურპრიზი გამოვა“

დღეს დილიდან, კიევის ცენტრში გადაკეტეს ქუჩები, მათ შორის აშშ-ის საელჩოსა და რკინიგზის მთავარ სადგურთან. ამის შესახებ უკრაინული მედიასაშუალებები იუწყებიან. დღესვე, ცნობილი გახდა, რომ უკრაინის საგარეო საქმეთა მინისტრი დმიტრო კულება არ გაემგზავრა ბრიუსელში, სადაც ევროკავშირის წევრი სახელმწიფოების საგარეო საქმეთა მინისტრებს უნდა შეხვედროდა.

გამოცემა „უკრაინსკა პრავდას“ ცნობით, საგარეო საქმეთა სამინისტროში ჯერჯერობით მხოლოდ იმას ამბობენ, რომ მოსალოდნელია უკრაინის ერთ-ერთი მთავარი პარტნიორის ვიზიტი. როგორც მინისტრის მოადგილემ, ანდრი მელნიკმა განაცხადა, „ინტრიგას შეინარჩუნებენ“ და იმედი აქვთ, რომ „სიურპრიზი გამოვა“.

უკრაინაში რუსეთის ფართომასშტაბიანი შეჭრის წლისთავზე დაგეგმილია აშშ-ის პრეზიდენტ ჯო ბაიდენის ვიზიტი უკრაინის მეზობელ პოლონეთში. თეთრ სახლს ვიზიტის დროდ დასახელებული აქვს 20-22 თებერვალი.

ამასთან, ცნობილია, რომ უახლოეს ხანში კიევში უნდა ჩავიდეს იტალიის პრემიერ-მინისტრი ჯორჯა მელონი.