კვების ობიექტებში ბათუმში, ქართულ ენაზე მომსახურების მიწოდებასთან დაკავშირებით დარღვევა გამოვლინდა – კონკურენციის სააგენტო

კონკურენციის სააგენტომ, ბათუმში, კვების ობიექტებში ქართულ ენაზე მომსახურების მიწოდებასთან დაკავშირებით დარღვევა დაადასტურა.

სააგენტოს ინფორმაციით, „მომხმარებლის უფლებების დაცვის შესახებ“ კანონის შესაძლო დარღვევის ფაქტებზე, 5 მოვაჭრის მიმართ შესწავლა დაასრულა. საკითხი ეხებოდა – კვებით ობიექტებში, მენიუს და მომსახურების არასახელმწიფო ენაზე მიწოდებას. სააგენტოს გადაწყვეტილებით, 3 მოვაჭრის – შპს „ქიზილ 2023“-ის, შპს „გრილ ფუდ“-ის და შპს „ჰარვიდენტის“ მხრიდან დარღვევის ფაქტი დადასტურდა. ხოლო, შპს „დანოს“ და შპს „მაქსი სედვიჩ ჩიქენის“ მხრიდან დარღვევა არ დადასტურდა.

აღსანიშნავია, რომ 6 მოვაჭრის მიმართ საქმის შესწავლა კვლავ გრძელდება.

“საკითხის შესწავლის პროცესში, რელევანტური გარემოებების დადგენა-დაზუსტების მიზნით, სააგენტოს მიერ მოთხოვნილი ინფორმაციის დადგენილ ვადაში მიუწოდებლობისთვის, შპს „გრილ ფუდს“ და შპს „ჰარვიდენტს“ ჯარიმა დაეკისრათ, თითოეულს 500 ლარის ოდენობით. დღეის მდგომარეობით, შპს „გრილ ფუდის“ მიერ ხსენებული ჯარიმა გადახდილია.

კონკურენციის ეროვნულმა სააგენტომ, აღნიშნული საქმის შესწავლა „ბათუმის მუნიციპალური ინსპექციის“ წერილის საფუძველზე დაიწყო. საკითხი ეხება ქ. ბათუმში, 11 მოვაჭრის მიერ, საზოგადოებრივი კვების ობიექტებში, კაფე-ბარებში, მხოლოდ უცხო ენაზე მომსახურებას. ამ ეტაპზე, 6 მოვაჭრის მიმართ საქმის შესწავლა გრძელდება. სააგენტოს მიერ მიღებული გადაწყვეტილება იქნება საჯარო და ყველასათვის ხელმისაწვდომი.

კანონმდებლობის შესაბამისად, ყველა მომხმარებელს უფლება აქვს – მოითხოვოს და მიიღოს ინფორმაცია სახელმწიფო ენაზე, ხოლო მისი არცოდნა არ შეიძლება მომსახურების გაწევაზე უარის თქმის მოტივი იყოს”,- აცხადებენ სააგენტოში.