“კეზერაშვილი რაც უფრო შორს იქნება ქართული პოლიტიკისგან, მით უკეთესი ქვეყნის მომავლისთვის”-ნიკა მელია

პარტია ახალის ერთ-ერთი ლიდერი, ნიკა მელია რუსთავი 2-ის მიერ გავრცელებულ ინფორმაციას გამოეხმაურა, სადაც ნათქვამია, რომ მელია და გვარამია საზღვარგარეთ, დავით კეზერაშვილთან შესახვედრად გაემგზავრნენ. მელიამ ეს ინფორმაცია უარყო და თქვა, რომ კეზერაშვილთან შეხვედრას არცერთ საკითხთან დაკავშირებით არც ახლა გეგმავს და არც მომავალში.

“ქართული ოცნების პარტიული ტელევიზიები, რომლებიც სუს-ის პირდაპირი დავალებით მოქმედებენ, ავრცელებენ ტყუილს, თითქოს, მე და ნიკა გვარამია ქვეყნის გარეთ დავით კეზერაშვილს ვხვდებით. კეზერაშვილთან დაკავშირებით ჩემი პოზიცია დიდი ხანია ცნობილია, რაც უფრო შორს იქნება ქართული პოლიტიკისგან, მით უკეთესი ქვეყნის მომავლისთვის.

ქვეყნისთვის გადამწყვეტ ბრძოლაში მორალური უპირატესობის შენარჩუნებაზე მნიშვნელოვანი არაფერია. პოლიტიკა საჯარო საქმედ რომ მიგვაჩნია, რომელიც კულუარული გავლენებითა და ფულით არ უნდა იმართებოდეს, ამიტომ შევქმენით პარტია ახალი. არავითარ შეხვედრას მასთან, არცერთ საკითხთან დაკავშირებით არ ვგეგმავ, არც ახლა და არც მომავალში”. – წერს მელია Facebook-ზე.

ტელეკომპანია რუსთავი 2-ის მიერ გავრცელებული ინფორმაციით, პარტია ახალის ლიდერები, ნიკა გვარამია და ნიკა მელია უცხოეთში, დავით კეზერაშვილთან შესახვედრად წავიდნენ, სადაც, მათივე ვერსიით, საუბრის ერთ-ერთი თემა საქართველოში მიმდინარე მოვლენები და საპროტესტო აქციები იქნება.