კახეთში, ყვარლის მუნიციპალიტეტში, 25 წლის კაცის მკვლელობის საქმეზე ერთი პირი დააკავეს. შინაგან საქმეთა სამინისტროს ინფორმაციით გამოძიება სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულისხმობს.
მომხდარ მკვლელობასთან დაკავშირებით ირკვევა, რომ 25 წლის გიგა არჯევნიშვილს ცივი იარაღით სასიკვდილო ჭრილობა შორეულმა ნათესავმა, წარსულში რამდენჯერმე ნასამართლევმა 37 წლის კაცმა მიაყენა.
მოკლულის მამა ამბობს, შვილის მკვლელობაზე ინფორმაცია გამომძიებელმა მიაწოდა.
“გამომძიებელმა დამირეკა და მითხრა არ იცი რა შეემთხვაო? არ ვიცი მე ვუთხარი. ჩამოდიო და ჩავედი. მითხრეს გზაზე დაიღუპაო.”,- ამბობს მოკლულის მამა.
ადგილობრივები ამბობენ: “როგორც თქვეს არტერიაა გადაჭრილიო. არც არავინაა მომტანი ამბისა, რომ გვითხრას. ალბათ, ყველა დაკავებულია ვინც იქ იყო”.
“მთავარი არხის” ინფორმაციით, მკვლელობა სოფელ შილდაში, ერთ-ერთ ოჯახში მოხდა, სადაც ახალგაზრდები ქეიფობდნენ. დაპირისპირების მიზეზი ადგილობრივებმა არ იციან.
სავარაუდო დამნაშავე, 37 წლის გელა ისაშვილი თელავის რეფერალურ საავადმყოფოშია გადაყვანილი. ვინაიდან ურთიერთდაპირისპირების დროს დაჭრეს და დაზიანებები მიიღო. ექიმების თქმით, მის სიცოცხლეს საფრთხე არ ემუქრება. ისაშვილმა ბოლოს სასჯელაღსრულების დაწესებულება 1 წლის წინ დატოვა. ის ცემის ფაქტზე იყო დაკავებული.
წყარო: mtavari.tv
Loading ...