კალანდის დღესასწაულზე შემოქმედში თოვლია ნავარაუდები

გურია კალანდის ტრადიციულ დღესასწაულს წელს ცივი და სუსხიანი ამინდით ხვდება. დილიდან წვიმს ოზურგეთში, მათ შორის სოფელ შემოქმედში, რომელიც წელს კალანდის აღნიშვნის ეპიცენტრია. ამინდის პროგნოზის მიხედვით, მთელი დღის მანძილზე ოზურგეთში წვიმა და 2-1 გრადუსი ტემპერატურაა მოსალოდნელი. თუმცა იგივე სინოპტიკოსების პროგნოზით 18 საათისთვის წვიმა შეწყდება, ხოლო საღამოს 20:00- დან თოვლია ნავარაუდები, რომელიც მათი ინფორმაციით, მთელი ღამის მანძილზე გასტანს.

შემოქმედში, ეთნოგრაფიულ მუზეუმსა და მის მიმდებარედ საკალანდო და ზოგადად საახალწლო დეკორაციების მონტაჟი და დღესასწაულისთვის მზადება ჯერ კიდევ გუშინდელი დღიდან დაიწყო. ღონისძიებები შემოქმედში 17:00 საათზე საკალანდო ბაზრობით დაიწყება და კულინარიული მასტერ-კლასით გაგრძელდება. უკვე 18:00 საათიდან კი დღის მთავარი მოვლენა: ტრადიციული საკალანდო რიტუალი – აგუნა, ჩიჩილაკი და ჭურის გახსნა დაიწყება. 19:00 საათზე ღონისძიებებს გალა-კონცერტი დაასრულებს,რომელში მონაწილეობასაც თეატრალურის კვარტეტი და ბენდი მიიღებს. კალანდა სოფელ შემოქმედში ფოიერვერკით დასრულდება.