ისაკო დევიძეზე, რომელიც დღეს ადმინისტრაციული წესით დააკავეს პოლიციამ იძალადა. ინფორმაციას ამის შესახებ მისი ადვოკატი, ლაშა ტყეშელაძე ავრცელებს. ტყეშელაძემ დაკავებული დიღმის პოლიციის იზოლატორში ცოტა ხნის წინ მოინახულა. მისივე ინფორმაციით, დევიძემ შიმშილობა დაიწყო:
“ისაკო დევიძესთან ქუჩაში გადაადგილების დროს მივიდნენ არაფორმაში ჩაცმული ადამიანები, ჩასვეს მანქანაში და უკვე იქ უთხრეს, რომ პოლიციელები იყვნენ და არ მისცეს უფლება, რო ვინმესთან დაერეკა და წაართვეს ტელეფონი. მითხრა, რომ მანქანიდან გადმოსვლის შემდეგ შეეცადა პოლიციელებისგან ცოტა გაწეულიყო, რომ რამე არ ჩადოთ მისთვის. მაგრამ იქ დახვდა ვიღაც ადამიანი, რომელმაც დააკავა. როდესაც უთხრეს, რომ სახლში წამოდიო, სადარბაზოში მასზე იძალადეს. უკვე როდესაც სახლში შეიყვანეს, ისაკო დევიძემ თვითონ გააღო კარი და სახლში შევიდნენ, დაიწყეს ჩხრეკა და ალბათ რომ ვერაფერი ვერ იპოვეს , დაუწყეს გინება, როდესაც ისაკომ უთხრა, რატომ მაგინებთო, ამაზე – რამდენს ლაპარაკობ ბიჭოო და მეორეჯერ განახორციელეს ფიზიკური ძალადობა. “ განაცხადა ადვოკატმა იზოლატორის დატოვების შემდეგ.
ადვოკატის თქმით, იზოლატორში გადაყვანის შემდეგ, პოლიცია დევიძეს უსვამდა შემდეგი შინაარსის შეკითხვებს: ვინ უნდა გადაკეტოს გზა? ხვალ აქციაზე რა მოხდება? ხომ არ იცნობთ ვინმე კეპიან და წვერიან ადამიანს? რა ტრენინგები გაიარეთ?
პოლიციამ სახლში ჩატარებული ჩხრეკის შემდეგ სამოქალაქო აქტივისტი ისაკო დევიძე რამდენიმე საათის წინ დააკავა.
Loading ...