ირმა ინაშვილი: ჩვენ ვართ მთავარი ოპოზიცია ქვეყანაში, ეს არის სიმართლე

„ჩვენ ვართ მთავარი ოპოზიცია ქვეყანაში, ეს არის სიმართლე“, – უთხრა სპორტის სასახლეში „პატრიოტთა ალიანსის“ შეკრებაზე მისულ ადამიანებს პარტიის ლიდერმა, ირმა ინაშვილმა, რომლის თქმითაც, ყველაფერი, რაც ახლა ხდება, იმის ბრალია, რომ თავის დროზე დამნაშავეები არ დაისაჯნენ და დღეს მისი მთავარი მიზანია, „დაისაჯონ დამნაშავეები, სააკაშვილები და ბოკერიები“.

„მინდა, ჩვენმა შვილებმა იცხოვრონ ისეთ ქვეყანაში, სადაც პატივს სცემენ ჩვენს რწმენას, ჩვენს ტრადიციებს, ჩვენს კულტურას, ჩვენს ფასეულობებს, საქართველოს გაუმარჯოს!

დღესაც იყო შეხვედრა ელჩებთან, დილიდან ვიყავით შეკრებილი. ჩემი მთავარი მოთხოვნა არის, არავითარი სავარძლები, არავითარი თანამდებობები, არავითარი გაყოფა მინისტრთა კაბინეტის და კოალიციები და ა.შ.

ჩემი მთავარი მიზანია, რომ ბოლოს და ბოლოს ჩვენ ვიყოთ ის მთავარი ძალა, რომელიც სინამდვილეში ნამდვილად ვართ. ჩვენ ვართ მთავარი ოპოზიცია ქვეყანაში. აი, ეს არის სიმართლე.

და რა გვესმის შვიდი წლის განმავლობაში, ვერ მივაღწიეთ იმას, რომ „ქართულმა ოცნებამ“ შეასრულოს მისი ერთი დაპირება მაინც, მთავარი დაპირება – დამნაშავეების დასჯა.

ეს დამნაშავეები რომ არ დასაჯეს, იმიტომ ხდება დღეს ის ყველაფერი, რასაც ჩვენ ვხედავთ, ამდენი უკიდეგანო უსამართლობა. დღევანდელ შეკრებაზე მარტო რეზოლუციის მიღებას აღარ ვითხოვთ, პირდაპირ ვითხოვთ, დასაჯეთ დამნაშავეები, სააკაშვილები და ბოკერიები“, – განაცხადა ირმა ინაშვილმა.

პარტიის შეკრებაზე დარბაზში მყოფებს ირმა ინაშვილის გარდა სიტყვით მიმართეს სხვა ლიდერებმაც. დეპუტატმა გიორგი ლომიამ ახსნა, თუ რატომ არიან ისინი სპორტის სასახლეში შეკრებილები.

„ვისაუბრებთ სამომავლო გეგმებზე. ეს არ არის ყრილობა, ეს არის აქცია. რატომ ვატარებთ აქციას დახურულ სივრცეში და სპორტის სასახლეში, ამაზე მარტივი პასუხია – რადგან როდესაც ჩავატარეთ აქცია ოპერის წინ, რატომღაც დათვალეს 1500 კაცი, როდესაც 8000-ზე მეტი იყო. ამიტომ ჩვენ ავირჩიეთ სპორტის სასახლე, რადგან დათვლადია და იმედი მაქვს, დღეს მათემატიკა არ შეეშლება იმ ხალხს, ვინც ითვლის ხოლმე. ჩვენ კიდევ ერთხელ ვაპროტესტებთ იმ ტყუილს, რომელიც გვაკადრა ხელისუფლებამ და ისევ და ისევ ვითხოვთ პროპორციულ სისტემაზე გადასვლას“, – განაცხადა გიორგი ლომიამ.

პარტიის ლიდერების თქმით, ამ შეხვედრაზე ისინი აპროტესტებენ 2020 წელს პროპორციულ საარჩევნო სისტემაზე გადასვლის შესახებ საკონსტიტუციო ცვლილებების ჩავარდნას. ირმა ინაშვილი 30 ნოემბერს მონაწილეობას იღებდა ხელისუფლებასა და ოპოზიციას შორის გამართულ შეხვედრაშიც, რომელიც ე.წ. გერმანული მოდელის შესაძლებლობებს განიხილავდა. ინაშვილმა ეს შეხვედრა დასრულებამდე დატოვა და, როგორც ამბობს, არც ოპოზიციის წევრების 31 ნოემბერს დაგეგმილ შეხვედრაზე აპირებს მისვლას.

„ხვალიდან ოპოზიციის შეხვედრაზე არ მივალ ლეიბორისტების ოფისში, ჩვენ ვმოქმედებთ დამოუკიდებლად და არავისთან გაერთიანებას არ ვაპირებთ და მათთან ერთად რაიმე ტიპის ქმედებების დაგეგმვას, მით უმეტეს“, – განაცხადა ინაშვილმა.

www.radiotavisupleba.ge