ირანში საპროტესტო აქციები ფართოვდება – პროტესტს შეუერთდნენ უნივერსიტეტები და სკოლები

ირანის მოქალაქეები უკვე მეჩვიდმეტე დღეა აწყობენ ანტისამთავრობო აქციებს, რომლებსაც ბიძგი მისცა მორალის პოლიციის მიერ ჰიჯაბის ტარების კანონების დარღვევისთვის დაკავებული ახალგაზრდა ქალის, მაჰსა ამინის სიკვდილმა. ირანის პრეზიდენტი, ებრაჰიმ რაისი კი გამოდის ეროვნული ერთიანობის მოწოდებით.

4 ოქტომბერს აქციებს შეუერთდნენ უნივერსიტეტები და სკოლები. სოციალური მედიით გავრცელებულ ვიდეოჩანაწერებში ჩანს თეირანსა და სხვა ქალაქებში გამართული დემონსტრაციები, რომელთა მონაწილეები სკანდირებენ ლოზუნგს “სიკვდილი დიქტატორს!”.

პარლამენტში გამართულ სხდომაზე რაისიმ აღიარა ქვეყანაში არსებული “ჩავარდნები და სისუსტეები”, თუმცა, ამავე დროს, გაიმეორა სხვა ოფიციალური პირების, მათ შორის უზენაესი ლიდერის, აიათოლა ალი ხამენეის განცხადებები, რომ მღელვარება ირანის მტრების მოწყობილია.

ირანის ხელისუფლება ბლოკავს სოციალურ მედიას და ინტერნეტს, რაც ართულებს მიმდინარე აქციების მასშტაბის დაზუსტებას. თვითმხილველები ჰყვებიან მთელ ქვეყანაში გამართულ სპონტანურ აქციებზე და დაუმორჩილებლობის მცირე აქტებზეც – დემონსტრანტები ლოზუნგებს ყვირიან სახურავებიდან, იჭრიან თმას და წვავენ სახელმწიფოს მიერ დაკანონებულ თავსაბურავებს.