ირანის მოქალაქეებმა 27 სექტემბერს მეთორმეტე ღამე გაატარეს აქციებზე, რომლებსაც ბიძგი მისცა ახალგაზრდა ქალის, მაჰსა ამინის სიკვდილმა მორალის პოლიციის მიერ ჰიჯაბის ტარების წესების დარღვევის გამო დაპატიმრების შემდეგ. საპროტესტო აქციები გრძელდება მიუხედავად იმისა, რომ დემონსტრაციებზე მძლავრ ზეწოლას ახორციელებს ხელისუფლება, იზრდება მსხვერპლის რიცხვი.
ფართომასშტაბიანი აქციები გაიმართა ბევრ ქალაქსა და სოფელში, თეირანის ჩათვლით. სოციალური მედიით ვრცელდება ვიდეოჩანაწერები, რომლებიც ასახავს შეხლა-შემოხლას დემონსტრანტებსა და პოლიციას შორის, თუმცა აქტივისტები ამბობენ, რომ ინტერნეტის ჩახშობის გამო ვიდეოების გავრცელება სულ უფრო რთული ხდება.
ნახევრადოფიციალური სააგენტო Fars-ი იუწყება, რომ 16 სექტემბერს ამინის სიკვდილის შემდეგ დაღუპულია 61 ადამიანი, თუმცა ირანის ადამიანის უფლებების ჯგუფი აცხადებს, რომ მსხვერპლი უტოლდება სულ მცირე 76-ს.
ოფიციალური პირების ცნობით, ქვეყნის მასშტაბით დაპატიმრებულია 1200-ზე მეტი მოქალაქე, მათ შორის აქტივისტები, ადვოკატები და ჟურნალისტები. დაკავებულებს შორისაა ექსპრეზიდენტის, აკბარ ჰაშემი რაფსანჯანის ქალიშვილი, რომელსაც აქციების წახალისებაში ედება ბრალი – იუწყება სააგენტო Tasnim-ი. აქციებს შეუერთდა ირანის უნივერსიტეტების რამდენიმე პროფესორი. ისინი უარს აცხადებენ ლექციების ჩატარებაზე ან საუნივერსიტეტო პოსტებს ტოვებენ.
Loading ...