ირანის საგარეო საქმეთა სამინისტრომ უკრაინის საქმეთა რწმუნებული დაიბარა, რათა პროტესტი გამოეხატა უკრაინის მთავრობის მიერ ირანზე აშშ-სა და ისრაელის იერიშებთან დაკავშირებით გაკეთებული “უადგილო განცხადებების” მიმართ.
გამოცემა Kyiv Independent-ის ინფორმაციით, თეირანი უკრაინას გაურკვეველი “შედეგებით” დაემუქრა იმ შემთხვევაში, თუკი მსგავსი განცხადებები ისევ განმეორდება.
მანამდე, უკრაინამ ხაზი გაუსვა ირანის მიერ რუსეთისთვის გაწეულ დახმარებას და ირანის ბირთვული პროგრამის სრული დაშლა მოითხოვა, რათა ირანი ახლო აღმოსავლეთისთვის ან ზოგადად მსოფლიოსთვის საფრთხეს ვერ წარმოადგენდეს.
პასუხად, ირანის საგარეო საქმეთა სამინისტროს ევრაზიულ საკითხთა დეპარტამენტის უფროსმა, შაჰრამ ფარასეიმ ირანში უკრაინის წარმომადგენლის მეშვეობით კიევს საპროტესტო ნოტა გადასცა, თუმცა სამინისტროს არ დაუკონკრეტებია, რა იგულისხმებოდა ირანის მხრიდან შესაძლო საპასუხო რეაქციაში.
ამასთან, თეირანის თქმით, უკრაინელმა მაღალჩინოსნებმა “უგულებელყვეს უკრაინის საერთაშორისო სამართლებრივი ვალდებულებები გაეროს ქარტიის, ისევე როგორც ჟენევის კონვენციების პრინციპებთან და მიზნებთან მიმართებით.”
ცნობისთვის, ირანს რუსეთისთვის ბალისტიკური რაკეტები და ათასობით “შაჰედის” დრონი აქვს მიწოდებული, რითაც ის დახმარებას უწევს რუსეთის არმიას უკრაინის წინააღმდეგ ომში, რაც Kyiv Independent-ის ცნობით, გაეროს ქარტიისა და საერთაშორისო სამართლის დარღვევაა.
Loading ...