ირაკლი ღარიბაშვილი საზოგადოებას ერეკლეობას ულოცავს

საქათველოს პრემიერმინისტრი, ირაკლი ღარიბაშვილი საზოგადოებას ერეკლეობას ულოცავს.

პრემიერი პოსტს Facebook-ზე აქვეყნებს და წერს, რომ “პატარა კახი” სიცოცხლეშივე იქცა ლეგენდად. მისი თქმით, ერეკლე მეფის გმირული ცხოვრება მისაბაძი მაგალითია თითოეული ჩვენგანისთვის.

“გილოცავთ ერეკლეობას!

პატარა კახი, როგორც სიყვარულით შეარქვა ხალხმა, სიცოცხლეშივე იქცა ლეგენდად. დიდი ილიას სიტყვებით, იგი ნახევარ საუკუნეზე მეტი ხმალამოღებული პატრონობდა სამშობლოს. განუწყვეტელი ომების მიუხედავად, ერეკლე II-ემ საფუძველი ჩაუყარა ქვეყნის მოდერნიზაციისაკენ მიმართულ მასშტაბურ რეფორმებს სახელმწიფოებრიობის, მრეწველობის, განათლების, კულტურის განვითარებისათვის.

ღვაწლმოსილი მეფე თავის თავში განასახიერებდა ქართველის ყველა საუკეთესო თვისებას – სიბრძნეს, სიმამაცეს, სამშობლოსადმი თავდადებას… მისი გმირული ცხოვრება მისაბაძი მაგალითია თითოეული ჩვენგანისათვის და მჯერა, ასეთად დარჩება ყველა მომავალი თაობისათვის”, – წერს ღარიბაშვილი.

ცნობისთვის, ზაფხულში აქტუალური გახდა ლიტერატორ ლევან ბერძენიშვილის მიერ ერეკლე მეფიშ შესახებ ნათქვამი ფრაზა, რომლითაც მან ის “გეორგიევსკის ტრაქტატის” გამო გააკრიტიკა. ამის შემდეგ თელავში ერეკლე მეორის მხარდასაჭერად საჯარო მოხელეების მონაწილეობით აქცია გაიმართა.