''ირაკლი გავრილოვი დაგვინიშნეს…'' – ოპოზიციის გურული ლიდერები თბილისში იმყოფებიან

”ერთიანი ნაციონალური მოძრაობის” ოფისთან საქართველოს სხვა რეგიონებთან ერთად მუდმივ რეჟიმში იმყოფებოდნენ ოპოზიციის ლიდერები გურიიდან. თუმცა ამ დილით, ნიკა მელიას დაკავების მომენტისთვის, მათივე თქმით, გურიის ოპოზიციური ფრთის წარმომადგენლებს მორიგეობა უკვე გაცვლილი ჰქონდათ აღმოსავლეთ საქართველოსთან და დროებით ოზურგეთში იყვნენ წამოსულები, როცა ნიკა მელიას დაკავების პროცესი დაიწყო.

დავით მჟავანაძე – ”ერთიანი ნაციონალური მოძრაობის” ოზურგეთის ორგანიზაციის თავმჯდომარე:

” ახალი ჩამოსულები ვიყავით ოზურგეთში, როცა ოფისზე შტურმი დაიწყო, მაგრამ ეგრევე  გავბრუნდით უკან  თბილისში. სიმბოლურია, რომ დღეს 23 თებერვალს მოხდა ეს გაუგონარი მოვლენები, თუმცა არც იმას გამოვრიცხავ, რომ ხელისუფლებამ ნიკა მელიას დაკავება სპეციალურად დაამთხვია 23 თებერვალს და ამით კრემლი გაახარა. რისთვის არის დაკავებული ნიკა მელია? დეპუტატს პარლამენტში შეჭრას ედავებიან, გავრილოვი კი, კაცი, რომელსც ოკუპაციის შესახებ კანონი დარღვეული ჰქონდა, შემოიყვანეს და პარლამენტში საპატიო ადგილზე დასვეს. ხომ ხედავთ, ამ აბსურდის გაგრძელებაა ის ყველაფერი, რაც ამ დილით მოხდა.გახარაიამაც კი, რომელსაც უამრავი დანაშაული აქვს ჩადენილი, არ ისურვა მონაწილეობა მიეღო ამ ყველაფერში, განსხვავებით ირაკლი ღარიბაშვილისგან, რომელიც არის რადიკალი, ჩარჩენილია 2012  წელში და ბიძინა ივანიშვილს ის სწორედ ამგვარი ბინძური დავალებების შესასრულებლად სჭირდება. ამათ სურთ, რომ დასავლურ ორბიტას მოგვწყვიტონ და პუტინის რუსეთში გვამყოფონ, მაგრამ არ გამოუვათ, რადგან ამ ქვეყანაში მრავლად ცხოვრობენ ისეთი ადამიანები, რომელთათვისაც სამშობლო მთავარი ღირებულებაა და ბოლომდე იბრძოლებენ თავისუფლებისთვის.

…ყველაფერს რომ თავის დავანებოთ, ქურდობას ჰქონდა ადგილი. ეს იყო ჩვეულებრივი ძარცვა. ხელისუფლებამ ოფისში არსებული სერვერები მოგლიჯა და კომპიუტერები წაიღო. ამ კომპიუტერებში ინახება აუარებელი ინფორმაცია, მათ შორის ჩვენი მხარდამჭერების მონაცემები, რომელიც კონფიდენციალურია და დარწმუნებული ვარ, ეს ყველაფერი დამატებით იარაღად იქცევა ”ქართული ოცნების” ხელში უბრალო ხალხის წინააღმდეგ.”

თბილისში იმყოფება ”ერთიანი ნაციონალური მოძრაობის” ლანჩხუთის ორგანიზაციის თავმჯდომარე კახა ასკურავაც.

კახა ასკურავა: ”ამ წუთებში რუსთაველის გამზირზე მივდივართ, ძალიან სიმბოლურია, რომ  საქართველოს გასაბჭოების  100 წლის თავს დაამთხვიეს დასავლური ღირებულებების მქონე მთავარი ოპოზიციური პარტიის შტურმით აღება და მისი ლიდერის დაკავება.  ღარიბაშვილის სახით ივანიშვილმა დაგვინიშნა გავრილოვი, ეროვნობით ქართველი ირაკლი გავრილოვი. ამაზე აუცილებლად მიიღებენ პასუხს ქართველი ხალხისგან.   ქართველები არასდროს გამოსულან ქუჩაში შიმშილის, სიცივის თუ სხვა ეკონომიკური პრობლემების გამო, მაგრამ ყოველთვის გამოდიოდნენ ღირსების დასაცავად და ასე იქნება ახლაც.ამ ეტაპისთვის საკმაოდ არაორდინალური სიტუაცია გვაქვს და ჯერ დეტალებზე არ გვიმსჯელია, მაგრამ დარწმუნებულები იყავით, ეს ბრძოლა არა მხოლოდ თბილისში იქნება, არამედ მთელ საქართველოს მოედება”