„ინფრასტრუქტურულ ხარვეზებთან ერთად, სიჩქარეს აჭარბებენ და არასწორად მანევრირებენ“ – რამ გამოიწვია ქობულეთის ავარია

„ქუთაისის შემოვლითი გზაც წლების განმავლობაში ერთ-ერთი ყველაზე მაღალი რისკის მონაკვეთი იყო, თუმცა მას შემდეგ რაც მაგისტრალი გაცალმხრივდა, საგზაო შემთხვევები შემცირდა იმ მიზეზებით, რაც ორმხრივ გზაზე ხდებოდა“, – ამის შესახებ „ბიზნესპრესნიუსთან“ „საქართველოს ალიანსი უსაფრთხო გზებისთვის“ გამგეობის თავმჯდომარემ, ეკა ლალიაშვილმა, განაცხადა.

ლალიაშვილის თქმით, ავარიის გამომწვევი 3 უმთავრესი ფაქტორი არსებობს. ასევე, იგი ყურადღებას ამახვილებს იმ დეტალებზე, რაც ქობულეთის შემოვლით გზას „შავი წერტილად“ აქცევს.

„ზაფხულის სეზონზე ქვეყნის მასშტაბით მობილობა მნიშვნელოვნად იზრდება, რაც საგზაო შემთხვევების რისკსაც ზრდის. უსაფრთხოებისა და პრევენციისთვის გადამწყვეტი მნიშვნელობა აქვს სამ ფაქტორს: 1) უსაფრთხო და ხარისხიანი ინფრასტრუქტურა; 2) გამართული სატრანსპორტო საშუალება; 3) მძღოლის ცნობიერება და პასუხისმგებლიანი ქცევა.

საერთაშორისო პრაქტიკით, „შავი წერტილი“ ოფიციალურად განისაზღვრება, როდესაც კონკრეტულ მონაკვეთზე 1 წლის განმავლობაში ფიქსირდება 3–5 მძიმე შედეგით დასრულებული საგზაო შემთხვევა. ასეთ შემთხვევაში, აუცილებელია ლოკაციის სიღრმისეული შესწავლა და პრევენციული ღონისძიებების გატარება.

ქობულეთის შემოვლით გზაზე საგზაო შემთხვევის კონკრეტულ გამომწვევი მიზეზები გამოძიებამ უნდა დაადგინოს. თუმცა, არსებული გამოცდილებით, შეიძლება ითქვას, რომ მსგავს ლოკაციებზე შემთხვევები უმეტესად კომბინირებული მიზეზებით არის განპირობებული: ინფრასტრუქტურულ ხარვეზებთან ერთად, სიჩქარის გადაჭარბება თუ არასწორი მანევრირება.

ქობულეთის შემოვლით გზაზე განსაკუთრებით პრობლემურია ის, რომ ორმხრივ მაგისტრალზე მაღალი ნაკადის პირობებში მძღოლებს ხშირად უწევთ სახიფათო მანევრირება და სიჩქარის გადაჭარბება, რაც მძიმე შედეგებით დასრულებულ საგზაო შემთხვევების რისკს კიდევ უფრო ზრდის.

ქუთაისის შემოვლითი გზაც წლების განმავლობაში ერთ-ერთი ყველაზე მაღალი რისკის მონაკვეთი იყო, თუმცა მას შემდეგ რაც მაგისტრალი გაცალმხრივდა, საგზაო შემთხვევები შემცირდა იმ მიზეზებით, რაც ორმხრივ გზაზე ხდებოდა.

ამ გამოცდილებამ აჩვენა, რომ ინფრასტრუქტურის მოდერნიზაცია და მკაცრი კონტროლი საგზაო შემთხვევებს ამცირებს“, – განაცხადა ლალიაშვილმა „ბიზნესპრესნიუსთან“.

www.bpn.ge