ინფექციონისტები მედიასთან საუბრისას გასცემენ რეკომენდაციას, როგორ უნდა დაიცვას თავი მოსახლეობამ ვირუსებისგან, განსაკუთრებით ახალი წლის დღეებში, როცა ხალხმრავლობაა და საზოგადოება რეკომენდაციების დაცვას ნაკლებად ერიდება.
როგორც ინფექციონისტი ირაკლი ხმალაძე აცხადებს, იქედან გამომდინარე, რომ ქვეყანაში სეზონური ვირუსები მარტივად არ მიმდინარეობს, საზოგადოებამ უნდა დაიცვას დისტანციის, პირბადის ტარებისა და აცრის ჩატარების რეკომენდაცია.
„ახალი წელია თუ არ არის ახალი წელი, ყველამ უნდა დაიცვას ვირუსის საწინააღმდეგო რეკომენდაციები. ჩვენ უნდა ვებრძოლოთ ვირუსებს ეპიდემიოლოგიური ხერხებით. პირველ ყოვლისა, მნიშვნელოვანია პრევენცია, ვიდრე მკურნალობა. აუცილებელია, რომ მოვერიდოთ ხალხმრავალ ადგილებს, მსგავსი ვირუსული ინფექციის დროს, აუცილებელია პირბადის ტარება და აცრების ჩატარება.
რეალურად, ახლა სეზონური ვირუსები საკმაოდ მძიმედ მიმდინარეობს. ფიქსირდება ვირუსის კლინიკური გამოვლინების ხშირი მაჩვენებელი. ასე, რომ მაქსიმალურად უნდა გაუფრთხილდეს მოსახლეობა საკუთარ ჯანმრთელობას. შესაბამისად, მნიშვნელოვანია, რომ მოსახლეობამ გარკვეული რეკომენდაციები დაიცვას“,- განაცხადა ხმალაძემ.
ინფექციონისტი ალექსანდრე გოგინავა აცხადებს, რომ კარგი იქნება, თუ ასაკოვან ადამიანებთან და ქრონიკული დაავადების მქონე ადამიანებთან ხშირი მიმოსვლა არ იქნება.
„არის რამდენიმე რეკომენდაცია, რომელიც უნდა გავითვალისწინოთ, ვურჩევდი ყველა იმ ადამიანს, რომელსაც აქვს სიმპტომები, რომ მოერიდოს შეკრებებს. ხალხმრავალი შეკრებების ადგილას უნდა მოხდეს სივრცის ხშირი განიავება. კარგი იქნება, თუ ასაკოვან და ქრონიკული დაავადების მქონე ადამიანებთან ხშირი მიმოსვლა არ იქნება. ახლა ქვეყანაში გვხვდება ვირუსის მძიმე მიმდინარეობა, ამიტომ მნიშვნელოვანია პრევენცია“,- განაცხადა გოგინავამ.
წყარო-პრაიმთაიმ.გე
Loading ...