“იმ ადამიანს არავის მოკვლა არ უნდოდა, ჰაერში გაისროლა ერთხელ” -რას ამბობს მძევალი

ქუთაისში, “საქართველოს ბანკში” მყოფი მოქალაქე, რომელიც ძარცვას შეესწრო და მძევლად აიყვანეს, მომხდარს იხსენებს. ლევან ასათიანი ამბობს, რომ შეიარაღებულ მძარცველს მძევლებისთვის შეურაცხყოფა არ მიუყენებია და არც არავის მოკვლის განზრახვა არ ჰქონია.

ვიჯექი ჩვეულებრივად, რიგის ნომერს ველოდებოდი. როცა შემოვიდა, ხმაურზე მივაქციე ყურადღება. ფორმა ეცვა, ეს შევნიშნე. თავიდან ერთხელ იყო გასროლის ხმა.  ბანკის თანამშრომელს სთხოვა “ფეისბუქ” ლაივის ჩართვა, მე უბრალოდ ტელეფონი გამოვართვი. იძახდა 2 მილიონი დოლარი სამ საათშიო, მეტს არაფერს.  არა მგონია, რომ შიგნით თანამზრახველი ჰყოლოდა. იმ ადამიანს არავის მოკვლა არ უნდოდა, ჰაერში გაისროლა ერთხელ. არანაირი ზედმეტი არაფერი უქნია, სიტყვიერადაც არ მოუყენებია შეურაცხყოფა გარშემო მყოფებისთვის,  – ამბობს ლევან ასათიანი.

შეგახსენებთ, რომ გუშინ, 20 სექტემბერს, “საქართველოს ბანკზე” მორიგი შეიარაღებული თავდასხმა მოხდა. ქუთაისში, მძარცველმა 12 მძევალი აიყვანა და სანაცვლოდ 2 მლნ დოლარს ითხოვდა. 9 საათიანი სპეცოპერაციის შემდეგ პოლიციამ მისი დაკავება შეძლო. ყველა მძევალი უვნებელია.