იგეგმება თუ არ მანქანის პრაქტიკული გამოცდის -მოედანზე ჩაბარების გაუქმება

მართვის მოწმობის მისაღები გამოცდის რეალურ მოძრაობაში გადატანის შემდეგ, 2022 წლის 25 აპრილიდან დღემდე მართვის მოწმობა 3000-მა პირმა აიღო. ამის შესახებ „ინტერპრესნიუსთან“ ინტერვიუში შსს-ს მომსახურების სააგენტოს დირექტორის მოადგილემ იმედა მაკასარაშვილმა განაცხადა.

როგორც მაკასარაშვილი ამბობს, გამოცდის რეალურ მოძრაობაში გადატანამ აჩვენა, რომ დახურულ მოედანზე „პრაქტიკულ გამოცდაზე მოუმზადებელი კანდიდატები მიდიოდნენ, რომელთან ერთადაც გზაზე გადაადგილება საკმაოდ სახიფათოა“.

„დღეის მდგომარეობით, დაახლოებით, 3000 პირს აქვს რეალურ მოძრაობაში პრაქტიკული გამოცდა წარმატებით ჩაბარებული და მოიპოვეს შესაბამისი კატეგორიის მართვის უფლება. ეს არც ისე ცოტაა, თუმცა, უფრო მეტ შედეგს ველოდებით. პროცენტულ მაჩვენებელს თუ ვნახავთ, 18-20%-ია დადებითი შედეგი. რაც დიდი მაჩვენებელი არ არის, მაგრამ ჯერ სიახლეა, კანდიდატებმა მომზადება ვერ მოახერხეს. მომავალში კიდევ უფრო მეტი მომზადებული კანდიდატი მოვა და მეტი დადებითი შედეგი გვექნება გამოცდაზე. ყველა კანდიდატისთვის ხელმისაწვდომია ის კვალიფიციური მოთხოვნები, რისი შესრულებაც ევალება მას და ნებისმიერს შეუძლია გაეცნოს. რაც შეეხება იმას, შემცირდა თუ არა პირველი ეტაპის მერე მართვის უფლების გამოცდის ჩაბარება, რა თქმა უნდა, შემცირდა. იმ კანდიდატების რაოდენობიდან, რომლებიც პირველ ეტაპს დადებითად აბარებენ და მეორე ეტაპზე გადადიან, ჩაბარების მაჩვენებელი 20%-ია.

პირველ ეტაპზე მოუმზადებელი კანდიდატები მოდიოდნენ, რომელთან ერთადაც გზაზე გადაადგილება საკმაოდ სახიფათოა. მოგეხსენებათ, ზომები უნდა იყოს მიღებული იმისთვის, რომ უსაფრთხოდ ჩატარდეს გამოცდა, არ დაზიანდეს როგორც სატრანსპორტო საშუალება, ისე კანდიდატის და ჩვენი თანამშრომლის სიცოცხლე და ჯანმრთელობა. ეს ერთ-ერთი ძირითადი გამოწვევაა ამ კუთხით. გადავამზადეთ თანამშრომლები, რომ ამისთვის ისინი მზად ყოფილიყვნენ“, – განაცხადა მაკასარაშვილმა.

მისივე თქმით, პრაქტიკული გამოცდის პირველი ეტაპის გაუქმება, რომელიც დახურულ მოედანზე გამოცდის ჩაბარებას გულისხმობს, ჯერჯერობით არ იგეგმება.

ამასთან, მაკასარაშვილმა აღნიშნა, რომ იყო საგამოცდო ავტომობილების დაზიანების ფაქტები, თუმცა, მისივე განმარტებით, როგორც ავტოსატრანსპორტო საშუალებები, ასევე მასში მსხდომი პირები დაზღვეულები არიან და ხარჯებს დაზღვევა ანაზღაურებს.

რაც შეეხება პრაქტიკული გამოცდის მეორე ეტაპის ზუგდიდში ჩატარებას, რომელიც ინფრასტრუქტურული პროექტების მიმდინარეობის გამო ამ დრომდე ვერ ხერხდებოდა, მაკასარაშვილის ინფორმაციით, მართვის მოწმობის მსურველ პირებს პრაქტიკული გამოცდის ამ ქალაქში ჩაბარება უახლოეს მომავალში შეეძლებათ.

ინტერვიუს სრული ვერსია იხილეთ ბმულზე. https://www.interpressnews.ge/ka/article/729212-gaamartla-tu-ara-martvis-mocmobis-asagebi-gamocdis-realur-mozraobashi-gadatanam-da-rogoria-chabareba-chachris-machvenebeli-interviu-shss-s-momsaxurebis-saagentos-direktoris-moadgilestan