იაპონელი მეცნიერები ვარაუდობენ, რომ კორონავირუსის „დელტა“ შტამი ბევრი მუტაციის შემდეგ შესაძლოა, თვითგანადგურებამდე მიდიოდეს

იაპონელი მეცნიერები ვარაუდობენ, რომ კორონავირუსის „დელტა“ შტამი ბევრი მუტაციის შემდეგ შესაძლოა, თვითგანადგურებამდე მიდიოდეს. იაპონური გამოცემა „ჯაფან თაიმსი“ წერს, რომ „დელტა“ ვარიანტთან დაკავშირებული მეხუთე და ყველაზე დიდი ტალღის შემდეგ, ქვეყანაში ამჟამად ინფიცირების შემთხვევების მკვეთრი კლება შეინიშნება.

იაპონური გამოცემა მკვლევრებზე დაყრდნობით აღნიშნავს, რომ შესაძლოა, „დელტა“ ვარიანტმა „იზრუნა საკუთარ თავზე თვითგანადგურების აქტით“.

სამი თვის განმავლობაში იაპონიაში ყოველდღიურად ინფიცირების 26 000 ახალი შემთხვევა ვლინდებოდა, ახლა კი ყოველდღიურად 200 ახალი შემთხვევის შესახებ იუწყებიან. ბევრი მკვლევარი მიუთითებს მრავალფეროვან შესაძლებლობებზე, რომლებიც მოიცავს ვაქცინაციის ერთ-ერთ ყველაზე მაღალ მაჩვენებელს მოწინავე ქვეყნებს შორის, სადაც მცხოვრებლების 75 პროცენტზე მეტი სრულად არის აცრილი. სხვა პოტენციური ფაქტორები არის სოციალური დისტანცირებისა და ნიღბის ტარების ზომები, რომლებიც ახლა ღრმად არის ჩანერგილი იაპონურ საზოგადოებაში.

„ჯაფან თაიმსის“ ინფორმაციით, მთავარი მიზეზი შეიძლება, დაკავშირებული იყოს გენეტიკურ ცვლილებებთან, რომლებსაც კორონავირუსი განიცდის რეპროდუქციის დროს, თვეში დაახლოებით ორი მუტაციით. გენეტიკის ეროვნული ინსტიტუტის პროფესორის, იტურო ინოუეს მიერ შემოთავაზებული პოტენციურად რევოლუციური თეორიის მიხედვით, „დელტა“ ვარიანტმა იაპონიაში დააგროვა ძალიან ბევრი მუტაცია ვირუსის შეცდომის გამომსწორებელ, არასტრუქტურულ ცილაში, სახელად „ენ ეს პი 14“. შედეგად, ვირუსი იბრძოდა შეცდომების დროულად გამოსწორებაზე, რამაც საბოლოოდ „თვითგანადგურებამდე“ მიიყვანა.

www.1tv.ge