თხილის სუბსიდირება გრძელდება – რამდენს მიიღებენ ფერმერები

თხილის სუბსიდირება გაგრძელდება. შესაბამისი დადგენილების მიხედვით, საუბარია, თხილის მოვლა-მოყვანისთვის საჭირო საქონლის ღირებულების სუბსიდირებაზე.

უფრო კონკრეტულად, დოკუმენტის თანახმად, პროგრამა ითვალისწინებს შემდეგი პირობებით სუბსიდიის მოცულობის განსაზღვრას:

თუ ბენეფიციარს საკუთრებაში (სარგებლობაში, ან ფაქტობრივ მფლობელობაში) ჯამურად აქვს არანაკლებ 0.2 ჰა-იდან არაუმეტეს 3 ჰა-ის ჩათვლით თხილის ბაღი (ბაღები), ყოველ 1 ჰა-ზე სუბსიდია 500 ლარით (ან ქულით) განისაზღვრება;

თუ ბენეფიციარებს თანასაკუთრებაში (თანასარგებლობაში, ან ფაქტობრივ თანამფლობელობაში) აქვთ 0.2 ჰა-დან 0.3 ჰა-მდე მოცულობის ბაღები, ყოველ 1 ჰა-ზე სუბსიდია 500 ლარით (ან ქულით) განისაზღვრება.

დოკუმენტის მიხედვით, სუბსიდიის გაცემა სამუშაო ჯგუფის მიერ, თხილის ბაღების კადასტრიდან ამოღებული ინფორმაციის საფუძველზე, სააგენტო ბანკს გადასცემს ბენეფიციარების ჩამონათვალს.

სააგენტო კი, სუბსიდიის თანხას ბანკში გახსნილ ანგარიშზე განათავსებს.

თავის მხრივ, ბანკი სააგენტოსგან მიღებული ინფორმაციის საფუძველზე მოახდენს ბენეფიციარების ბარათებზე შესაბამისი ოდენობის ქულების ან/და თანხის დარიცხვას.

რაც შეეხება პროგრამით სარგებლობის ვადებს, 2025 წლის 1-ლი იანვრიდან, 31 აგვისტოს ჩათვლით არის განსაზღვრული.

შეგახსენებთ, რომ გარემოს დაცვისა და სოფლის მეურნეობის სამინისტროს ინიციატივით, თხილის წარმოების ხელშემწყობი სახელმწიფო პროგრამა, 2022 წლიდან მოქმედებს.

www.bpn.ge